Andijon viloyati hokimligi huzurida oziq-ovqat xavfsizligini ta’minlash jamg‘armasi tashkil etilib, unga mahalliy budjetdan 10 milliard so‘m mablag‘ ajratiladi. Bu haqda 20-oktabr kuni o‘tkazilgan Xalq deputatlari Andijon viloyat kengashining o‘n uchinchi sessiyasida viloyat hokimi Shuhrat Abdurahmonov ma’lum qildi deya xabar berdi “Daryo” muxbiri.
Shuhrat Abdurahmonovning qayd etishicha, 2020-yilda jami 99,3 milliard so‘m kelgusi olti oylik uchun oziq-ovqat mahsulotlari zaxirasini yaratish uchun sarflanadi. Shundan 64,2 milliard so‘mi tijorat banklari tomonidan beriladigan kredit bo‘lsa, 25,1 milliard so‘m tadbirkorlarning o‘z mablag‘lari hisoblanadi. Qolgan 10 milliard so‘mi esa yangi tashkil etiladigan jamg‘arma hisobidan ajratib beriladi.
“Pandemiya davrida aholini qish va bahor oylarida asosiy turdagi oziq-ovqat mahsulotlari bilan uzluksiz ta’minlash, ichki iste’mol bozorida narx–navoni barqaror saqlash, mahsulotlarni zaxiraga jamg‘arish masalasi asosiy vazifamiz ekanligini his qildik. Shu maqsadda viloyat hokimligi huzurida oziq-ovqat xavfsizligini ta’minlash jamg‘armasini tuzish maqsadga muvofiq deb o‘yladik. Men bir narsaga alohida to‘xtalmoqchiman. Shu vaqtga qadar zaxira uchun biror marta budjetdan pul ajratilmagan. Zaxira tashkil etish vaqti kelganda tadbirkorlarga kredit ajratilar edi va ular oziq-ovqatni g‘amlab qo‘yishardi. Prezidentimiz topshirig‘i bilan bu yil jarayonga alohida e’tibor qaratilmoqda. Bunaqasi birinchi marta bo‘lyapti”, — dedi viloyat hokimi.
Viloyat rahbari jamg‘arma mablag‘i nimaga sarflanishiga ham to‘xtalib o‘tgan.
“Jamg‘armaga ajratiladigan mablag‘lar nimaga sarflanishi ko‘pchilikni qiziqtirishi tabiiy. Ushbu mablag‘lar bozorlarda narx-navo keskin oshishining oldini olish, dehqon bozorlarida tashkil etilgan ‘Daladan dasturxongacha’ arzonlashtirilgan yarmarkalarni mol va qo‘y go‘shti, kartoshka, piyoz, guruch, un, shakar hamda o‘simlik yog‘i bilan uzluksiz ta’minlash maqsadida tadbirkorlik subyektlarini qo‘llab-quvvatlash uchun sarflanadi”, — degan Shuhrat Abdurahmonov.
Izoh (0)