Андижон вилояти ҳокимлиги ҳузурида озиқ-овқат хавфсизлигини таъминлаш жамғармаси ташкил этилиб, унга маҳаллий бюджетдан 10 миллиард сўм маблағ ажратилади. Бу ҳақда 20 октябрь куни ўтказилган Халқ депутатлари Андижон вилоят кенгашининг ўн учинчи сессиясида вилоят ҳокими Шуҳрат Абдураҳмонов маълум қилди дея хабар берди «Дарё» мухбири.
Шуҳрат Абдураҳмоновнинг қайд этишича, 2020 йилда жами 99,3 миллиард сўм келгуси олти ойлик учун озиқ-овқат маҳсулотлари захирасини яратиш учун сарфланади. Шундан 64,2 миллиард сўми тижорат банклари томонидан бериладиган кредит бўлса, 25,1 миллиард сўм тадбиркорларнинг ўз маблағлари ҳисобланади. Қолган 10 миллиард сўми эса янги ташкил этиладиган жамғарма ҳисобидан ажратиб берилади.
«Пандемия даврида аҳолини қиш ва баҳор ойларида асосий турдаги озиқ-овқат маҳсулотлари билан узлуксиз таъминлаш, ички истеъмол бозорида нарх–навони барқарор сақлаш, маҳсулотларни захирага жамғариш масаласи асосий вазифамиз эканлигини ҳис қилдик. Шу мақсадда вилоят ҳокимлиги ҳузурида озиқ-овқат хавфсизлигини таъминлаш жамғармасини тузиш мақсадга мувофиқ деб ўйладик. Мен бир нарсага алоҳида тўхталмоқчиман. Шу вақтга қадар захира учун бирор марта бюджетдан пул ажратилмаган. Захира ташкил этиш вақти келганда тадбиркорларга кредит ажратилар эди ва улар озиқ-овқатни ғамлаб қўйишарди. Президентимиз топшириғи билан бу йил жараёнга алоҳида эътибор қаратилмоқда. Бунақаси биринчи марта бўляпти», — деди вилоят ҳокими.
Вилоят раҳбари жамғарма маблағи нимага сарфланишига ҳам тўхталиб ўтган.
«Жамғармага ажратиладиган маблағлар нимага сарфланиши кўпчиликни қизиқтириши табиий. Ушбу маблағлар бозорларда нарх-наво кескин ошишининг олдини олиш, деҳқон бозорларида ташкил этилган ‘Даладан дастурхонгача’ арзонлаштирилган ярмаркаларни мол ва қўй гўшти, картошка, пиёз, гуруч, ун, шакар ҳамда ўсимлик ёғи билан узлуксиз таъминлаш мақсадида тадбиркорлик субъектларини қўллаб-қувватлаш учун сарфланади», — деган Шуҳрат Абдураҳмонов.
Изоҳ (0)