Qashqadaryo viloyatining G‘uzor tumanidagi taqsimlash markazi faoliyati to‘xtatildi. Bu haqda xabar bergan tuman hokimi Bekzod Suyunov tumanda koronavirusdan davolanuvchi bemorlar yo‘qligi sabab taqsimlash markaziga ehtiyoj qolmaganini ma’lum qildi, deya xabar berdi “Daryo” muxbiri.
Ta’kidlanishicha, bugun G‘uzor tuman hokimligida Xalq deputatlari tuman Kengashining navbatdagi sessiyasi bo‘lib o‘tgan.
Sessiyada so‘z olgan hokim Bekzod Suyunov tumandagi bozorlarda oziq-ovqat mahsulotlarining narxini barqarorlashtirish haqida so‘z yuritib, viloyatdagi uchta markazlardan biri bo‘lgan, 150 o‘rinli taqsimlash markazi faoliyati xususida ham gapirib bergan.
Aytilishicha, Sho‘rtan sport majmuasida tashkil etilgan taqsimlash markazi ayni kunda koronavirusdan davolanuvchi bemorlar qolmagani sabab o‘z faoliyatini yakunlagan.
“Mazkur taqsimlash markazida faoliyat yurituvchi tibbiyot xodimlariga oyiga 500 million so‘m oylik maosh to‘lab kelardik. Shukurki, bu taqsimlash markaziga ayni kunda ehtiyoj qolmagani bois yopildi. Shu taqsimlash markaziga hech kimning ishi tushmasin deb, yopdik”, — deydi tuman hokimi Bekzod Suyunov bu haqda ma’lumot berar ekan.
Eslatib o‘tamiz, tumandagi mazkur taqsimlash markazi viloyatdagi uchta markazning biri bo‘lib, markazga olib kelingan fuqarolar to‘liq tahlildan o‘tkazilganidan so‘ng kasallik darajasi va salomatligining holatiga ko‘ra, shifoxonalarga yo‘naltirilar edi.
G‘uzor viloyatda birinchi bo‘lib “qizil” hudud maqomini olgan tuman bo‘lib, viloyatda koronavirusdan vafot etgan 64 yoshli birinchi bemor ham shu tumanda istiqomat qilgan.
Mavzuga doir:
Izoh (0)