Qashqadaryo viloyatining Dehqonobod tumanida faoliyat yurituvchi tadbirkor Bekzod Berdiyev Qarshi shahri aholisini arzonlashtirilgan go‘sht bilan ta’minlashga va’da berdi. Viloyat hokimi esa bu tashabbusni olqishlab, tadbirkorga 1 milliard so‘m foizsiz kredit berilishini ma‘lum qilgan. Bu haqda “Daryo”ga viloyat hokimligi axborot xizmati rahbari Ahror Sodiqov ma’lum qildi.

Bekzod Berdiyev.

Foto: Qashqadaryo viloyat hokimligi

Ta’kidlanishicha, 2020-yil 20-oktabr kuni Xalq deputatlari Qashqadaryo viloyati kengashining navbatdagi sessiyasi bo‘lib o‘tgan.

Foto: Qashqadaryo viloyat hokimligi

Unda so‘z olgan viloyat rahbari Zoir Mirzayev deputatlarga yuzlanib, oziq-ovqat omborlari eshiklarini ochish vaqti kelganini ta’kidlagan va “... ayrim oziq-ovqat mahsulotlarida narx-navo qimmatlashib ketmoqda. Oziq-ovqat zaxirasi yetarli, ammo, u bozorda emas, ‘uddaburon’ tadbirkorlarning omborxonalarida. Agar deputatlarimiz ham bizga ko‘maklashsa, shundagina omborxonalar eshigini ochamiz. Xalqni vakili sifatida ularni manfaatlari uchun ozroq o‘zimizni qiynashimiz kerak”, degan.

Foto: Qashqadaryo viloyat hokimligi

Viloyat hokimi chorvachilik uchun berilayotgan milliardlab kreditlar natija bermayotganini tanqid qilib, vijdonli tadbirkorlar arzonlashtirilgan go‘sht yetkazib bermasa, viloyatda go‘sht narxi 100 ming so‘mga chiqib ketishi mumkinligini aytgan.

“Koson, Chiroqchi va G‘uzor hokimliklariga rahmat. Qarshi shahridagi bozorlarga yarmarka narxida go‘sht yetkazib bermoqda. Shu tartib o‘ylab chiqilmaganida, go‘sht narxi 100 ming so‘mga chiqib ketar edi”, — degan hokim.

Foto: Qashqadaryo viloyat hokimligi

Viloyat rahbarini tashvishlantirgan muammoga javob bergan dehqonobodlik tadbirkor Bekzod Berdiyev Qarshi shahri aholisini kilosi 55 ming so‘m bo‘lgan arzonlashtirilgan go‘sht bilan ta’minlash mas’uliyatini o‘z zimmasiga olgan. Zoir Mirzayev esa tadbirkorning tashabbusini olqishlab, unga viloyat hokimligi huzurida oziq-ovqat xavfsizligini ta’minlash va ichki bozorda narx-navo barqarorligini saqlash maqsadida budjeti 24 milliard so‘mlik bo‘lgan jamg‘arma hisobidan tadbirkorga foizsiz 1 milliard so‘m kredit berilishini ma’lum qilgan.