“O‘zbekiston milliy elektr tarmoqlari” AJ 21-oktabr kuni tonggi soat 06:52 da favqulodda o‘chgan Turkmaniston energetika tizimiga qarashli 500 kilovattli “Serdar-Mari GRES” yuqori kuchlanishli elektr tarmog‘ining faoliyati tiklanganini xabar qildi.
Qayd etilishicha, ushbu havo tarmog‘i orqali O‘zbekistonga 750 MVtgacha elektr energiyasi importi yetkazib berilgan, sodir bo‘lgan nosozlik tufayli O‘zbekiston energetika tizimida 316 MVt quvvat bilan iste’molchilar vaqtincha tarmoqdan uzilgan. Shuningdek, tonggi soat 7:00 dan boshlab elektr stansiyalardagi mavjud rezerv quvvatlarni oshirish orqali tarmoqdan uzilgan iste’molchilarga kuchlanish berish bo‘yicha zarur choralar ko‘rilgan.
22-oktabr kuni 11:09 da Turkmaniston energetika tizimi mutaxassislari havo tarmog‘idagi nosozliklarni bartaraf etgan, O‘zbekistonga elektr energiyasi eksport amaliyotini tiklangan.
“O‘zbekiston milliy elektr tarmoqlari” AJ O‘zbekiston iste’molchilarini elektr energiyasi bilan ta’minlash maqsadida “Issiqlik elektr stansiyalari” hamda “O‘zbekgidroenergo” aksiyadorlik jamiyatlari tarkibidagi bug‘-gaz qurilmalari hamda gidroinshootlar tomonidan elektr energiyasini ishlab chiqarish jarayoni rejaga muvofiq davom etayotgani, bu jarayonga Turkmanistondan import amaliyoti ham qo‘shildi va ayni paytda respublikadagi elektr ta’minoti tizimi barqaror faoliyat yuritayotganini ma’lum qilgan.
Izoh (0)