Қирғизистон парламенти президентлик сайловлари ўтказиладиган санани белгилай олмади

Қирғизистон парламенти президентлик сайловларини қачон ўтказиш борасида қарор чиқара олмади. Бу ҳақда «РИА Новости» хабар қилди.

Тилек Тўхтагазиев қишлоқ хўжалиги вазири лавозимига тайинланганидан кейин депутатларнинг кўпчилиги мажлис залини тарк этишни бошлаган. Палата сайловнинг ўтказилиш санасини муҳокама қилишни бошлаганида залда 27 нафар халқ депутатлари қолган, йиғилиш бошланганида халқ вакилларининг сони 80 нафар бўлган. Якуний қарор чиқарилиши учун камида 61 нафар халқ вакили мажлисда иштирок этиши талаб этилади.

Залда қолган депутатлар президентлик сайловларини ўтказиш санаси муҳокамасини 22 октябрга қолдиришни таклиф этди. Халқ депутати Омурбек Текебаевнинг қайд этишича, агар Қонунчилик мажлиси чоршанба куни ярим тунгача президентлик сайловларини ўтказиш санасини белгиламаса, у ҳолда МСК автоматик тарзда сайловларга тайёргарлик бошлаб юбориши мумкин.

5 октябрда Қирғизистонда парламент сайловларининг натижаларига нисбатан халқнинг оммавий норозилик намойишлари бошланган. Намойишчиларнинг кучишлатар тизим вакиллари билан тўқнашувидан кейин норозилик билдираётган оломон президент администрацияси жойлашган парламент биносини эгаллаган. Тўқнашувлар оқибатида 1,2 минг нафар киши талафот кўрган ва бир нафар фуқаро ҳалок бўлган. Бош вазир Қубатбек Бўронов истеъфо берди. Қирғизистон президенти Сўронбай Жээнбековнинг матбуот котиби унинг Бишкекда экани ва ҳаммасини назорати остида ушлаб турганини маълум қилди.

9 октябрда Бишкекда халқнинг норозилик намойишлари қайта бошланди. Марказий майдонда бош вазир Садир Жапаровнинг тарафдорлар ва мухолифат вакиллари ўртасида тўқнашув кузатилди. Оқибатда 7 нафар одам, жумладан, мухолифат етакчиси Тилек Тўхтагазиев жароҳат олди.

15 октябрь куни Сўронбай Жээнбеков Қирғизистон президентлиги лавозимидан истеъфо берганини эълон қилди. У бош вазир Садир Жапаров ва бошқа сиёсатчилардан ўз тарафдорларини пойтахтдан олиб чиқиб кетишни сўраган ва улардан бишкекликлар тинчлигини бузмасликни илтимос қилган. 16 октябрь куни парламент мажлисида қонунчилик кенгаши спикери Канат Исаев давлат раҳбарининг вазифаларини вақтинча бажаришни рад этган. Якунда бош вазир Садир Жапаров президент вазифасини бажарувчига айланди.

21 октябрь куни Жўқорғи Кенеш (Қирғизистон парламенти)га қайта сайловлар 2020 йил 20 декабрда бўлиб ўтиши, тегишли қарорни мамлакат Марказий сайлов комиссияси 21 октябрь куни қабул қилгани ҳақида хабар берилди.