Qirg‘iziston prezidenti vazifasini bajaruvchi Sadir Japarov mamlakatda iqtisodiy amnistiya e’lon qildi. Bu haqda “24.kg” xabar berdi.
“Menga berilgan vakolatlardan foydalanib, rasman iqtisodiy amnistiya e’lon qilaman”, — deya ma’lum qilgan prezident vazifasini bajaruvchi bosh vazir Sadir Japarov.
Uning so‘zlariga ko‘ra, hozirgi paytda davlat hokimiyatining barcha yo‘nalishlariga katta vazifalar yuklanmoqda. Sadir Japarovning o‘zi davlat rahbari va bosh vazir vazifalarini bajarmoqda.
Xabar berilishicha, Sadir Japarov davlat budjetini to‘ldirish, shu jumladan, qo‘shimcha resurslarni undirish, xorijga noqonuniy olib chiqib ketilgan kapitalni qaytarish, biznesning xufiyona resurslarini qonuniy maydonga chiqarish uchun iqtisodiy amnistiya e’lon qilish haqida qaror qabul qildi.
Bundan tashqari, Japarov amnistiya hisobidan barcha tadbirkorlik subyektlari uchun teng sharoitlar yaratish, ijobiy makroiqtisodiy ko‘rsatkichlarga erishish, qisqa muddatda mamlakat iqtisodiyotini qo‘llab-quvvatlash uchun zarur mablag‘larni undirish va tashqi qarz to‘lovlarini ta’minlash istagida.
Sadir Japarovning so‘zlariga ko‘ra, so‘nggi 30 yil ichida energetika, bojxona va soliq xizmati, dori ta’minoti, litsenziya berish, yer ostidan foydalanish va boshqa shu kabi sohalarda tizimli korrupsion sxemalar rivojlangan.
“Shu munosabat bilan oddiy xalq hisobidan yashagan, uni o‘margan korrupsionerlarga, jinoiy sxema tashkil qilganlarga, turli kompaniyalarda ulushga ega bo‘lgan sobiq mansabdorlarga, reyderlik yo‘li bilan yirik kompaniyalarning aksiyalarini noqonuniy egallab olgan mansabdorlarga, soliq to‘lashdan bo‘yin tovlayotgan tadbirkorlarga, amaldagi qonunchilikni buzishga aloqador bo‘lgan yoki ko‘rsatib o‘tilgan qilmishlarni amalga oshirishga yordam berayotgan alohida mansabdorlarga, vazirlik va idoralar rahbarlariga, bojxonachilar va moliyachilarga 30 kun muddat beraman. Istaymanki, barcha o‘z ixtiyori bilan mavjud holatlar haqida real ma’lumotlarni oshkor qilsin va taqdim etsin”, — deya ma’lum qilgan Japarov.
U davlatdan noqonuniy olingan har bir tiyinni ixtiyoriy ravishda qaytarishni, shuningdek, yashirin mulk va kapital haqidagi ma’lumotlarni oshkor qilish va taqdim etishni talab qilgan.
Davlat rahbarining ma’lum qilishicha, qisqa muddatda iqtisodiy amnistiya va pul mablag’larini, ko‘char va ko‘chmas mulkni legallashtirish uchun huquqiy baza tayyorlanadi. Uning aytishicha, agar bu imkoniyatga e‘tiborsizlik qilinsa va undan foydalanilmasa, qonun doirasida eng qat’iy choralar ko‘riladi.
Avvalroq Qirg‘izistonda Davlat bojxona qo‘mitasi raisining sobiq o‘rinbosari 700 million dollarni mamlakatdan olib chiqib ketishda gumonlanib qo‘lga olingandi.
Izoh (0)