Shveysariya federal kanselyariyasi mamlakatning har bir fuqarosiga, shu jumladan, bolalarga ham 7500 Shveysariya franki (taxminan 7 ming yevro) to‘lash haqidagi tashabbusni rasmiy axborotnomada chop etdi, deb xabar beradi Meduza.
2022-yil 22-aprelgacha tashabbusni 100 ming kishi qo‘llab-quvvatlasa, u referendumga olib chiqiladi. Agar referendum bo‘lib o‘tsa, tashabbus qabul qilinganidan keyin kamida bir yil ichida pul to‘lanadi.
Mamlakatning har bir fuqarosiga 7500 frankdan to‘lash taklifi bilan Sankt-Gallen kantonining yetti fuqarosi chiqqan. Tashabbus mualliflariga ko‘ra, Shveysariya Milliy banki milliy valyuta qiymatini tushirish uchun “vertolyot puli”ni (yakuniy iste’molchilar orasida erkin taqsimlanadigan qaytarilmaydigan pul) to‘lashi kerak. G‘oya mualliflari fikricha, pulni to‘lash uchun yangi pullar chiqarilishi kerak, taklif etilgan summa esa soliqlardan ozod etilishi kerak.
2016-yil iyunida bo‘lib o‘tgan referendumda Shveysariya aholisining ko‘pchiligi mamlakatda fuqarolarga ularning ishlash-ishlamasligidan qat’i nazar, oyiga 2500 frank miqdorida kafolatlangan daromad joriy qilinishiga qarshi ovoz bergan edi.
Eslatib o‘tamiz, Shveysariya hukumati 19-oktabr kunidan barcha jamoat joylarida majburiy niqob taqishni joriy qildi.
Izoh (0)