Isroil va Birlashgan Arab Amirliklari o‘z fuqarolari uchun vizasiz rejimni joriy qilishga kelishib oldi. Bu haqdagi kelishuv BAAning yuqori mansabli shaxslaridan iborat delegatsiyaning Isroil poytaxti Tel-Aviv shahriga safari vaqtida imzolandi, deb xabar bermoqda Meduza.
Ma’lum qilinishicha, kelishuvni imzolash marosimida Isroil bosh vaziri Binyamin Netanyaxu, AQSh moliya vaziri Stiven Mnuchin va BAAning ikki nafar vaziri ishtirok etgan.
Birlashgan Arab Amirliklari Isroil bilan o‘zaro vizasiz rejim haqida kelishuvga erishgan birinchi arab mamlakati bo‘ldi.
Shuningdek, BAA delegatsiyasining Isroilga tashrifi davomida investitsiyalarni himoya qilish, yo‘lovchi aviaqatnovlari, fan va texnologiyalar sohasidagi hamkorlik to‘g‘risida kelishuvlar imzolangan.
Vizasiz rejim kuchga kirishi uchun kelishuvni ikki mamlakat ham ratifikatsiya qilishi, shu jumladan, Isroil parlamenti ma’qullashi kerak.
Isroil ayni paytgacha to‘rtta arab mamlakati — Misr, Iordaniya, Bahrayn va BAA bilan munosabatlarni yaxshilash haqidagi tinchlik kelishuviga erishgan. Vizasiz rejimni joriy qilish masalasi qolgan uchta davlat bilan muhokama qilinmoqda.
Avvalroq Isroil va Bahrayn rasman diplomatik aloqalar o‘rnatgani haqida xabar berilgandi.
Izoh (0)