Belarus prezidenti Aleksandr Lukashenko o‘z tarafdorlarini u hokimiyatdan ketganidan keyin vaziyat qanday bo‘lishi haqida o‘ylashga chaqirdi. Bu haqda “Interfaks” xabar bergan.
“Belarus prezidentiga kelsak, u zo‘rlik bilan ushlab turilgan hukumat uzoqqa bormasligi haqida ko‘p gapirgan. Gap menda emas. Masala sizlarda qolgan: bu mamlakatda mensiz ahvolingiz ne kechadi?”, – deya Lukashenkoning so‘zlaridan iqtibos keltirgan “BelTA”.
Aleksandr Lukashenko ushbu gaplari bilan o‘zining mamlakatdagi o‘rni borasidagi fikrlarda oshirib yuborgan bo‘lishi mumkinligini ham qayd etgan.
“Siz ushbu mamlakatda yashashda davom etasiz. Xo‘sh, nima bo‘ladi? Siz ular kechagi voqealar sabab sizga achinadi deb o‘ylaysizmi? Ular rahm qiladimi? Aksincha, sizlarni qiymalab tashlashi hech gap emas”, – degan Lukashenko.
Eslatib o‘tamiz, Belarusda 9-avgust kuni bo‘lib o‘tgan saylovlarni soxtalashtirish haqidagi ma’lumotlar fonida norozilik namoyishlari boshlandi va haligacha davom etmoqda. Namoyishchilar Lukashenkoni saylov natijalarini soxtalashtirishda ayblamoqda. Saylov natijalariga ko‘ra, Aleksandr Lukashenko 80 foiz ovoz to‘plagan.
Belarus Markaziy saylov komissiyasi ma’lumotlariga ko‘ra, Svetlana Tixanovskaya prezidentlik saylovida 10,1 foiz ovoz to‘plagan. Tixanovskayaning o‘zi esa mag‘lubiyatini tan olmadi va o‘zini “Belarus xalqi tomonidan saylangan yagona yetakchi” deb atadi. Saylovdan ikki kun o‘tgach Tixanovskaya Litvaga chiqib ketgan. Uning safdoshlari Tixanovskaya hukumat bosimi ostida mamlakatdan chiqib ketganini ma’lum qilgan.
Sobiq prezidentlikka nomzod Svetlana Tixanovskayaning tarafdorlari 18-avgust kuni yangi saylovlar o‘tkazish orqali mamlakatda hokimiyatni tranzit qilish maqsadida Muvofiqlashtiruvchi kengash tuzdi. Belarus bosh prokurori Aleksandr Konyukning ta’kidlashicha, Muvofiqlashtiruvchi kengash faoliyati konstitutsiyaga qarshi va hokimiyatni qo‘lga olishga qaratilgan.
Kengashning tashkil etilishi munosabati bilan Jinoyat kodeksining 361-moddasi bilan jinoyat ishi qo‘zg‘atilib, uning doirasida Muvofiqlashtiruvchi kengashning bir nechta vakillari hibsga olingan.
Belarus prezidenti Aleksandr Lukashenko 10-oktabr kuni Davlat xavfsizlik qo‘mitasi tergov hibsxonasida Muvofiqlashtiruvchi kengash va muxolifatning qo‘shma shtabining hibsga olingan vakillari bilan uchrashdi. Keyinchalik, Belarus hukumati Svetlana va Sergey Tixanovskiyga 134 kun ichida birinchi marta suhbatlashishiga ruxsat etdi, 13-oktabrda Tixanovskayaning Belarus hukumatiga “xalq ultimatum”ini e’lon qilgani haqida xabar berildi.
Izoh (0)