O‘zbekistonda xizmat ko‘rsatgan fan arbobi, taniqli olim, iqtisodiyot fanlari doktori, professor Rustam Shodiyev 82 yoshida vafot etdi.
Rustam Shodiyev mehnat faoliyatini 1960-yilda O‘zbekiston Fanlar akademiyasi iqtisodiyot institutida laborantlikdan boshlagan va 26 yil davomida kichik ilmiy xodimdan to ilmiy ishlar bo‘yicha direktor o‘rinbosari lavozimigacha ko‘tarilgan.
U Mehnat vaziri o‘rinbosari va Tashqi ishlar vazirligida boshqarma boshlig‘i lavozimlarida ishlagan. Bank-moliya akademiyasi ilmiy markaziga rahbarlik qilgan.
1997-yildan 2005-yilgacha — Jahon iqtisodiyoti va diplomatiya universitetida “Jahon iqtisodiyoti” kafedrasi mudiri, 2005-2019-yillarda esa Toshkent davlat iqtisodiyot universitetining “Xalqaro turizm” kafedrasi professori lavozimida faoliyat yuritgan.
Rustam Shodiyev o‘zbek tilida ilk bor 2005-yilda va keyinchalik qayta chop etilgan “Jahon iqtisodiyoti” fani darsligining muallifidir. 120 dan ortiq maqolalari (ulardan 18 tasi xorijda) va 4 ta (bittasi ingliz tilida) yirik monografiyasi chop etilgan. 3 nafar fan doktori va 30 nafar iqtisodiyot fanlari nomzodini tayyorlagan. 1988-yilda “O‘zbekistonda xizmat ko‘rsatgan fan arbobi” unvoniga sazovor bo‘ldi, “O‘zbekiston Milliy ensiklopediyasi”ga kiritildi, Xalqaro biografik markazining (Angliya) “XX asrning 2000 nafar atoqli intellektuallari” kitobiga kiritilib, yorliq va medal bilan taqdirlandi.
Rustam Shodiyev, shuningdek, O‘zFA Kibernetika institutida, keyinchalik uzoq yillar nafaqaga chiqishiga qadar O‘zbekiston Mehnat vazirligi qoshidagi ilmiy tekshirish institutida katta ilmiy xodim lavozimida ishlagan.
Avvalroq O‘zbekiston Qahramoni, arxeolog G‘ayratdin Xo‘janiyozov 72 yoshida, Texnika fanlari doktori, professor Nusrat Murodov 52 yoshida, akademik Shavkat Akmalxonov 87 yoshida, akademik Tursunboy Rashidov 86 yoshida, akademik To‘ra Mirzayev vafot etgani haqida xabar berilgan edi.
Izoh (0)