Ўзбекистонда хизмат кўрсатган фан арбоби, таниқли олим, иқтисодиёт фанлари доктори, профессор Рустам Шодиев 82 ёшида вафот этди.
Рустам Шодиев меҳнат фаолиятини 1960 йилда Ўзбекистон Фанлар академияси иқтисодиёт институтида лаборантликдан бошлаган ва 26 йил давомида кичик илмий ходимдан то илмий ишлар бўйича директор ўринбосари лавозимигача кўтарилган.
У Меҳнат вазири ўринбосари ва Ташқи ишлар вазирлигида бошқарма бошлиғи лавозимларида ишлаган. Банк-молия академияси илмий марказига раҳбарлик қилган.
1997 йилдан 2005 йилгача — Жаҳон иқтисодиёти ва дипломатия университетида «Жаҳон иқтисодиёти» кафедраси мудири, 2005-2019 йилларда эса Тошкент давлат иқтисодиёт университетининг «Халқаро туризм» кафедраси профессори лавозимида фаолият юритган.
Рустам Шодиев ўзбек тилида илк бор 2005 йилда ва кейинчалик қайта чоп этилган «Жаҳон иқтисодиёти» фани дарслигининг муаллифидир. 120 дан ортиқ мақолалари (улардан 18 таси хорижда) ва 4 та (биттаси инглиз тилида) йирик монографияси чоп этилган. 3 нафар фан доктори ва 30 нафар иқтисодиёт фанлари номзодини тайёрлаган. 1988 йилда «Ўзбекистонда хизмат кўрсатган фан арбоби» унвонига сазовор бўлди, «Ўзбекистон Миллий энциклопедияси»га киритилди, Халқаро биографик марказининг (Англия) «ХХ асрнинг 2000 нафар атоқли интеллектуаллари» китобига киритилиб, ёрлиқ ва медал билан тақдирланди.
Рустам Шодиев, шунингдек, ЎзФА Кибернетика институтида, кейинчалик узоқ йиллар нафақага чиқишига қадар Ўзбекистон Меҳнат вазирлиги қошидаги илмий текшириш институтида катта илмий ходим лавозимида ишлаган.
Аввалроқ Ўзбекистон Қаҳрамони, археолог Ғайратдин Хўжаниёзов 72 ёшида, Техника фанлари доктори, профессор Нусрат Муродов 52 ёшида, академик Шавкат Акмалхонов 87 ёшида, академик Турсунбой Рашидов 86 ёшида, академик Тўра Мирзаев вафот этгани ҳақида хабар берилган эди.
Изоҳ (0)