Senatning sakkizinchi yalpi majlisida Qoraqalpog‘iston Jo‘qorg‘i Kengesi raisi Murat Kamalov O‘zbekiston Senati raisi o‘rinbosari etib saylandi.
Kamalovga elektron tizim orqali yashirin ovoz berish yo‘li bilan majlisda ishtirok etayotgan 78 nafar senatorning 72 nafari yoqlab ovoz bergan. 6 nafar senator texnik xato tufayli ovoz bera olmagani aytildi.
Ma’lumki, Senat raisi o‘rinbosarlaridan biri Qoraqalpog‘iston vakili bo‘lishiga oid konstitutsion norma mavjud. Shu bois senator Murat Kallibekovich Kamalovni Senat raisi o‘rinbosari lavozimiga saylash to‘g‘risida taklif Prezident tomonidan taqdimnoma kiritilgan edi.
Murat Kamalov 1955-yilda Nukus shahrida tug‘ilgan. Oliy ma’lumotga ega huquqshunos sifatida ko‘p yillar turli lavozimlarda faoliyat yuritgan.
65 yoshli Murat Kamalov 2020-yil 20-sentabr kuni bo‘lib o‘tgan navbatdan tashqari saylovlar vaqtida Jo‘qorg‘i Kenges deputati etib saylangan edi. Saylovlar arafasida e’lon qilingan nomzodlar ro‘yxatidagi ma’lumotlarga ko‘ra, Ekopartiya a’zosi hisoblangan Kamalov saylovgacha Prezident huzuridagi Orolbo‘yi xalqaro innovatsiya markazi direktori lavozimida ishlab kelgan.
Mavzuga doir: Qoraqalpog‘iston sobiq rahbarining o‘g‘li, respublika DXX sobiq rahbari. Murat Kamalov haqida
11-oktabr kuni Qoraqalpog‘iston Jo‘qorg‘i Kengesi, xalq deputatlari tuman va shahar kengashlarining bo‘shab qolgan o‘rinlarga O‘zbekiston Senati a’zolarini saylash bo‘yicha qo‘shma majlisda esa Murat Kamalov senator etib saylangan.
Qoraqalpog‘istonning Murat Kamalovdan avvalgi rahbari hisoblangan Musa Yerniyazov 2020-yil 31-iyul kuni koronavirus infeksiyasi asoratlari oqibatida vafot etgan edi.
Izoh (0)