Ijtimoiy tarmoqlarda Xorazm viloyatining Urganch shahri markazida yalang‘och holda yurgan erkakning videosi tarqaldi. Viloyat IIBning ma’lum qilishicha, mazkur fuqaroning shaxsi aniqlanib, hozirda surishtiruv ishlari olib borilmoqda.
Tarqalgan video va suratlarda erkak kishining Urganch shahri markazida kiyimsiz holda yurgani aks etgan. Bundan tashqari, ushbu fuqaro hududda xizmat olib borayotgan Milliy gvardiya Qo‘riqlash boshqarmasi xodimlari talabiga bo‘ysunmasdan, ular bilan qo‘pol munosabatda bo‘lgan.
Olib borilgan surishtiruv ishlari davomida ko‘chada yalang‘och holda yurgan erkak Urganch shahrida istiqomat qiluvchi, 1994-yilda tug‘ilgan, ilgari sudlanmagan hamda IIOda hisobda turmaydigan fuqaro ekanligi aniqlangan.
“Bugungi kunda Ichki ishlar organlari va tibbiyot xodimlari tomonidan ushbu fuqaroning ruhiy holatiga oydinlik kiritilmoqda. Holat bo‘yicha uning xatti-harakatlariga huquqiy baho beriladi. Shundan so‘ng bu borada qo‘shimcha axborot beriladi”, — deydi viloyati viloyati IIB boshlig‘i o‘rinbosari Sardor Rahimov.
Avvalroq Toshkentda sevgan qizi bilan urishib qolgan yigit mast holda ko‘chada yalang‘och yurgani to‘g‘risida xabar berilgandi.
Eslatib o‘tamiz, 2020-yilning mart oyida ijtimoiy tarmoqlarda Samarqand shahri ko‘chalarida kiyimsiz yurgan erkaklarning videosi tarqalgandi. Videodagi erkaklar shaxsi aniqlanib, ular mayda bezorilik sodir etganlikda aybli deb topilgan va ma’muriy qamoq jazosiga hukm qilingandi.
Izoh (0)