Tanzila Norboyeva: “Deyarli har kuni budjet mablag‘larining noo‘rin sarflanishi bilan bog‘liq masalalar ko‘tarilmoqda”

Senatning sakkizinchi yalpi majlisida Senat raisi Tanzila Norboyeva budjet mablag‘larining noo‘rin sarflanishi bilan bog‘liq masalalar ko‘tarilayotganiga to‘xtalib o‘tdi.

“Deyarli har kuni xalqimiz tomonidan budjet mablag‘larining noo‘rin sarflanishi bilan bog‘liq masalalar ko‘tarilmoqda. Afsuski, xalqimiz, ya’ni soliq to‘lovchilar har doim ham bunday savollarga asosli javob ololmayapti. Xolis munosabat ham bildirilmayapti bu bo‘yicha”,—deydi Norboyeva.

Senat raisi senat Hisob palatasi bilan birgalikda budjet mablag‘laridan samarali foydalanish borasidagi ishlarni Toshkent viloyati misolida kompleks o‘rganib chiqilgani, unda juda ko‘plab tizimli muammolar aniqlanganini bildirgan. Mutasaddilarda budjetga qo‘shimcha manbalar aniqlash borasida tashabbuskorlik, izlanish yo‘qligini alohida qayd etganini ta’kidladi.

Ayrim hollarda ularga moliyaviy savodxonlik yetishmasligining ham guvohi bo‘ldik. Muhim ko‘rsatkichlarni qo‘shib yozish holatlariga ham to‘la barham berilmagan. Shu bois hozirdanoq mazkur yo‘nalishdagi ishlarimizni tanqidiy ko‘rib chiqishimiz, budjet nazoratini yanada kuchaytirishimiz lozim bo‘ladi. Senatning Budjet va iqtisodiy islohotlar masalalari qo‘mitasi hamda boshqarmasi bunday tahlillar ko‘lamini yanada kengaytirishi tizimli muammolar yechimi yuzasidan asosli takliflar ishlab chiqishi lozim.

Tanzila Norboyeva, Senat raisi 

Eslatib o‘tamiz, avvalroq Senat raisi Toshkent viloyati hokimligida bo‘lib o‘tgan Senat kengashining sayyor majlisida Qumqo‘rg‘onda 6,5 milliard so‘mga qurilgan, biroq oradan ko‘p o‘tmay qulab tushgan ko‘prik masalasiga to‘xtalib, “Nima sababdan qurilish sohasida ko‘plab qonun buzilishi sodir bo‘lsa ham ularning sabablari, ularga yaratilayotgan “sharoitlar” chuqur o‘rganilmayapti. Qachongacha budjet mablag‘lari, xalq rizqi talon-toroj qilinadi?!”, — deya e’tiroz bildirgan edi. O‘sha majlisda, shuningdek, Toshkent viloyati bir qancha sohalarda qilinayotgan ishlari oqsayotgani, ayrim tizimli xato va kamchiliklarga yo‘l qo‘yilganligi tanqid qilingan.