UFC jangchisi Said Nurmagomedov (16-2, 4 KO) UFC Fight Island 6 musobaqasida Mark Shtraygl ustidan 1-raunddayoq nokaut evaziga g‘alaba qozondi.
Rossiyalik jangchi musobaqadan so‘ng fikrlari bilan o‘rtoqlashib, hafta oxirida bo‘ladigan UFC 254 musobaqasida ham jang qilishga tayyorligini bildirdi.
“O‘zimni yaxshi his qilyapman. Ortiqcha harakat qilishga hojat bo‘lmadi. Bu faoliyatimdagi eng tezkor g‘alaba. O‘tgan jang uchun tayyorgarlik yaxshi bo‘lmagandi. Jarohat olib, butun mashg‘ulotlarni kurashsiz o‘tkazgandim. Faqat yengil sparringlar, yugurish va lapa bilan ishlash. Shunga qaramay jangni yaxshi o‘tkazgandim. Bu safar esa chap qo‘l zarbasidan so‘ng raqibning o‘zinini yo‘qotishini kutmagandim. Shundan so‘ng raqibga bo‘g‘ish usulini qo‘llamoqchi edim, biroq jamoadoshlarim urishni davom ettirishim kerakligini ayta boshladi. Yakunda esa g‘alaba qozondim. Rejalarga keladigan bo‘lsak, yana hoziroq jang qilishni xohlardim. Agar iloji bo‘lsa, kelasi haftadayoq. Har qanday holatda ham 2020-yil oxiriga qadar yana jang qilishni xohlayman”, — deydi Said Nurmagomedov.
Ma’lumot uchun, UFC promousheni bayrog‘i ostida Nurmagomedov familiyasi ostida 4 nafar sportchi jang qiladi. Habib Nurmagomedov va uning amakivachchalari — Abubakar hamda Umar. Umarning UFC’dagi debyuti yana qoldirildi. Said Nurmagomedovning esa Habib va uning oilasiga hech qanday aloqasi yo‘q. Ularning familiyasi bir xil, xolos.
Eslatib o‘tamiz, UFC 254 musobaqasida ishtirok etishi kutilgan Islom Maxachevning jangi bekor qilindi. Boisi uning raqibi Rafael dos Anyosga koronavirus aniqlandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)