Britaniyaning Daily Star nashri mamlakat Ichki ishlar vazirligi tomonidan e’lon qilingan hisobotni tahlil qildi va 2019/2020-yilgi mavsumda muxlislari eng ko‘p hibsga olingan klublarni aniqladi.
Unga ko‘ra, futbol bilan bog‘liq eng ko‘p hibsga olish holatlari “Lids” muxlislari orasida qayd etilgan — 52. Muxlislar tartibsizliklar uchun 19 marotaba, alkogol ichimliklari bilan bog‘liq huquqbuzarliklar uchun 15 marotaba, zo‘ravonlik tartibsizliklari uchun 10 marotaba, yana uchtasi maydonga begona buyumlarni uloqtirgani uchun, ikkitasi maydonga yugurib chiqqani uchun va yana bir martadan qurol saqlagani, pirotexnika vositalaridan foydalangani va zarar yetkazgan jinoyat uchun hibsga olingan.
Muxlislar orasida qamoqqa olinish bo‘yicha keyingi o‘rinlarda “Birminghem Siti” (49) “Bolton” (45), “Aston Villa” (31), “Vest Hem” (30), “Manchester Siti” (29) va “Kardiff” (27) klublari bormoqda.
Ta’kidlanishicha, hibsga olingan “Lids” muxlislari soni har hafta o‘yinlarga tashrif buyuradigan o‘n minglab odamlarning atigi bir qismidir. Biroq xavotirga qo‘yadigan jihat, bu raqamlarning o‘tgan mavsumlarga qaraganda o‘sib borayotganidir. Masalan, 2018/2019-yilgi mavsumda “Lids” muxlislarini futbol bilan bog‘liq 49 ta hibsga olish holati kuzatilgan.
2019/2020-yilgi mavsumda mamlakat bo‘ylab hibsga olinganlarning umumiy soni 2018/2019-yilgi mavsumga nisbatan 1381 dan 1089 gacha kamaygan. Ammo koronavirus pandemiyasi tufayli bu raqamlarni taqqoslashlar noto‘g‘ri bo‘lib, pandemiya muxlislar tashrif buyurgan o‘yinlar sonini sezilarli darajada kamaytirgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)