UFC жангчиси Саид Нурмагомедов (16-2, 4 КО) UFC Fight Island 6 мусобақасида Марк Штрайгл устидан 1-раунддаёқ нокаут эвазига ғалаба қозонди.
Россиялик жангчи мусобақадан сўнг фикрлари билан ўртоқлашиб, ҳафта охирида бўладиган UFC 254 мусобақасида ҳам жанг қилишга тайёрлигини билдирди.
«Ўзимни яхши ҳис қиляпман. Ортиқча ҳаракат қилишга ҳожат бўлмади. Бу фаолиятимдаги энг тезкор ғалаба. Ўтган жанг учун тайёргарлик яхши бўлмаганди. Жароҳат олиб, бутун машғулотларни курашсиз ўтказгандим. Фақат енгил спарринглар, югуриш ва лапа билан ишлаш. Шунга қарамай жангни яхши ўтказгандим. Бу сафар эса чап қўл зарбасидан сўнг рақибнинг ўзинини йўқотишини кутмагандим. Шундан сўнг рақибга бўғиш усулини қўлламоқчи эдим, бироқ жамоадошларим уришни давом эттиришим кераклигини айта бошлади. Якунда эса ғалаба қозондим. Режаларга келадиган бўлсак, яна ҳозироқ жанг қилишни хоҳлардим. Агар иложи бўлса, келаси ҳафтадаёқ. Ҳар қандай ҳолатда ҳам 2020 йил охирига қадар яна жанг қилишни хоҳлайман», — дейди Саид Нурмагомедов.
Маълумот учун, UFC промоушени байроғи остида Нурмагомедов фамилияси остида 4 нафар спортчи жанг қилади. Ҳабиб Нурмагомедов ва унинг амакиваччалари — Абубакар ҳамда Умар. Умарнинг UFC’даги дебюти яна қолдирилди. Саид Нурмагомедовнинг эса Ҳабиб ва унинг оиласига ҳеч қандай алоқаси йўқ. Уларнинг фамилияси бир хил, холос.
Эслатиб ўтамиз, UFC 254 мусобақасида иштирок этиши кутилган Ислом Махачевнинг жанги бекор қилинди. Боиси унинг рақиби Рафаэл дос Аньосга коронавирус аниқланди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)