Andijon viloyati Baliqchi tumanida ikki Nexia to‘qnashuvi natijasida ikki kishi halok bo‘ldi, deya xabar bermoqda Tergov departamenti.
Ma’lum qilinishicha, 2020-yil 18-oktabr kuni soat 15:00 da 40 yoshli F.X. o‘z boshqaruvidagi Nexia rusumli avtomashinasini Baliqchi tumani “Afsona” MFY hududidan o‘tgan Baliqchi–O‘rmonbek avtomobil yo‘lining O‘rmonbek yo‘nalishi bo‘yicha harakatlanib kelayotib, qarama-qarshi yo‘nalishga chiqib ketgan.
Oqibatda ushbu haydovchi shu yo‘nalishda qarshisidan harakatlanib kelayotgan 53 yoshli A.O‘. boshqaruvidagi yana bir Nexia rusumli avtomashinasi bilan to‘qnashuv sodir etgan.
Natijada, avtomashinalardan birining haydovchisi F.X. va yo‘lovchi 53 yoshli J.M. hodisa joyida vafot etgan. Har ikki avtomashinadagi yana 3 nafar yo‘lovchi va boshqa bir haydovchi turli ko‘rinishdagi tan jarohatlari olib kasalxonaga murojaat qilgan.
Mazkur holat yuzasidan Baliqchi tumani IIB huzuridagi Tergov bo‘linmasi tomonidan Jinoyat kodeksining 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Hozirda tergov harakatlari olib borilmoqda.
Avvalroq Jizzaxda yoritish chiroqlarisiz harakatlangan Cobalt yuk mashinasiga urilishi oqibatida bir kishi, Farg‘onada avtomobil boshqaruvini yo‘qotib, daraxtga urilgan 16 yoshli haydovchi, Andijonda Damas yuk mashinasiga urilishi oqibatida voyaga yetmagan yo‘lovchi va Chilonzorda avtomobil boshqaruvini yo‘qotib, daraxtga urilgan 21 yoshli haydovchi halok bo‘lgani haqida xabar berilgandi.
Izoh (0)