Андижон вилояти Балиқчи туманида икки Nexia тўқнашуви натижасида икки киши ҳалок бўлди, дея хабар бермоқда Тергов департаменти.
Маълум қилинишича, 2020 йил 18 октябрь куни соат 15:00 да 40 ёшли Ф.Х. ўз бошқарувидаги Nexia русумли автомашинасини Балиқчи тумани «Афсона» МФЙ ҳудудидан ўтган Балиқчи–Ўрмонбек автомобиль йўлининг Ўрмонбек йўналиши бўйича ҳаракатланиб келаётиб, қарама-қарши йўналишга чиқиб кетган.
Оқибатда ушбу ҳайдовчи шу йўналишда қаршисидан ҳаракатланиб келаётган 53 ёшли А.Ў. бошқарувидаги яна бир Nexia русумли автомашинаси билан тўқнашув содир этган.
Натижада, автомашиналардан бирининг ҳайдовчиси Ф.Х. ва йўловчи 53 ёшли Ж.М. ҳодиса жойида вафот этган. Ҳар икки автомашинадаги яна 3 нафар йўловчи ва бошқа бир ҳайдовчи турли кўринишдаги тан жароҳатлари олиб касалхонага мурожаат қилган.
Мазкур ҳолат юзасидан Балиқчи тумани ИИБ ҳузуридаги Тергов бўлинмаси томонидан Жиноят кодексининг 266-моддаси 3-қисми «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Ҳозирда тергов ҳаракатлари олиб борилмоқда.
Аввалроқ Жиззахда ёритиш чироқларисиз ҳаракатланган Cobalt юк машинасига урилиши оқибатида бир киши, Фарғонада автомобиль бошқарувини йўқотиб, дарахтга урилган 16 ёшли ҳайдовчи, Андижонда Damas юк машинасига урилиши оқибатида вояга етмаган йўловчи ва Чилонзорда автомобиль бошқарувини йўқотиб, дарахтга урилган 21 ёшли ҳайдовчи ҳалок бўлгани ҳақида хабар берилганди.
Изоҳ (0)