“Real” yarim himoyachisi Eden Azar hamon jarohatidan tiklanish bilan band, deya yozmoqda Marca.
Ta’kidlanishicha, Azar La Liga 7-turi doirasida 24-oktabr kuni “Barselona”ga qarshi o‘tadigan o‘yinni o‘tkazib yuborishi aniq bo‘lib ulgurgan. Futbolchining o‘zi ham, “Real” rahbariyati va jamoa bosh murabbiyi Zinedin Zidan ham maydonga tezroq qaytish borasida tavakkalga qo‘l urmoqchi emasligi ma’lum qilingan. Asosiy vazifa sifatida esa Azarning avvalgi jismoniy holatini tiklash va o‘ziga bo‘lgan ishonchni qaytarishdan iborat etib belgilangan. “Real” vakillari Edenning safga to‘la kuch bilan qaytishini istamoqda.
Hozircha futbolchining qachon aniq safga qayta olishi ma’lum emas. Yarim himoyachi ayni damda sport zalida mashg‘ulot o‘tamoqda.
Eslatib o‘tamiz, madridliklar Azarning mushaklardagi jarohati bilan bog‘liq ma’lumotni 30-sentabrda e’lon qilgandi. O‘shanda futbolchining 3–4 haftani maydondan tashqarida o‘tkazishi aytilgandi.
Ma’lumot uchun, Azar 2019/20-yilgi mavsum La Ligada 16 ta o‘yinda qatnashib, bitta gol urdi va oltita golli uzatmani amalga oshirdi. U mavsum davomida uch marta jarohat ham oldi. Yangi mavsumda esa u hali bir marta ham maydonga tushgani yo‘q.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)