«Реал» ярим ҳимоячиси Эден Азар ҳамон жароҳатидан тикланиш билан банд, дея ёзмоқда Marca.
Таъкидланишича, Азар Ла Лига 7-тури доирасида 24 октябрь куни «Барселона»га қарши ўтадиган ўйинни ўтказиб юбориши аниқ бўлиб улгурган. Футболчининг ўзи ҳам, «Реал» раҳбарияти ва жамоа бош мураббийи Зинедин Зидан ҳам майдонга тезроқ қайтиш борасида таваккалга қўл урмоқчи эмаслиги маълум қилинган. Асосий вазифа сифатида эса Азарнинг аввалги жисмоний ҳолатини тиклаш ва ўзига бўлган ишончни қайтаришдан иборат этиб белгиланган. «Реал» вакиллари Эденнинг сафга тўла куч билан қайтишини истамоқда.
Ҳозирча футболчининг қачон аниқ сафга қайта олиши маълум эмас. Ярим ҳимоячи айни дамда спорт залида машғулот ўтамоқда.
Эслатиб ўтамиз, мадридликлар Азарнинг мушаклардаги жароҳати билан боғлиқ маълумотни 30 сентябрда эълон қилганди. Ўшанда футболчининг 3–4 ҳафтани майдондан ташқарида ўтказиши айтилганди.
Маълумот учун, Азар 2019/20 йилги мавсум Ла Лигада 16 та ўйинда қатнашиб, битта гол урди ва олтита голли узатмани амалга оширди. У мавсум давомида уч марта жароҳат ҳам олди. Янги мавсумда эса у ҳали бир марта ҳам майдонга тушгани йўқ.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)