Oksford universiteti olimlari koronavirus infeksiyasini besh daqiqadan kamroq vaqt ichida aniqlay oladigan testni ishlab chiqdi, deb xabar beradi Reuters agentligi.
Mutaxassislar qayd etishicha, ularning ixtirosi aeroportlarda va kompaniyalarda odamlarni yoppasiga ekspress testdan o‘tkazishda qo‘llanilishi mumkin. Oksford olimlarining qo‘shimcha qilishicha, ular tajribaviy namunani 2021-yil boshida chiqarishga umid qilmoqda. Yana olti oydan keyin esa tasdiqlangan modelni taqdim etish rejalashtirilmoqda.
Ta’kidlanishicha, yangi test COVID-19’ni aniqlashda yuqori aniqlikni namoyon etadi, shu bilan birga, u ushbu virusni boshqa kasalliklardan farqlashga ham qodir. Oksford universitetining fizika departamenti professori Axill Kapanidis ixtiro yordamida koronavirusni oson va tez tekshirish mumkinligini qayd etdi.
Oksfordda yaratilgan test antigen hisoblanadi — bu shuni bildiradiki, u antigenlarni (virus oqsillarini) aniqlaydi. Olimlar taxmin qilishicha, bunday sxema bo‘yicha ishlaydigan qurilmalar yoppasiga testdan o‘tkazishni tezroq va samaraliroq amalga oshirish imkonini beradi, ammo hozirda mavjud bo‘lgan namunalar aniqlikda molekulyar PZR testlardan ortda qoladi.
Avvalroq JSST koronavirusga qarshi dorilarning samaradorligi past ekanligini ma’lum qildi. Bunda gap nafaqat remdesivir, balki gidroksixloroxin, lopinavir va interferon haqida ham bormoqda. Bundan tashqari, JSST tadqiqoti bu dorilar COVID-19’ga chalingan bemorning kasalxonada yotish vaqtini deyarli qisqartirmasligini ko‘rsatdi.
Shuningdek, COVID-19’ga chalinganda kasalxonada davolanish xavfini olti baravarga oshiradigan kasalliklar haqida ma’lumot berildi. Koronavirus infeksiyasiga chalingan bemorda yurak qon-tomir kasalliklarining bo‘lishi uning kasalxonaga tushish xavfini olti baravarga oshiradi, bunda o‘lim holatlari kuzatilishining ehtimoli o‘n ikki baravarga oshadi. Bu haqda Rossiya sog‘liqni saqlash vazirligining Kardiologiya tibbiy tadqiqotlar markazi bosh direktori, Rossiya Fanlar akademiyasining akademigi Sergey Boytsov ma’lum qilgan
Izoh (0)