Rossiyada Suriyadan berilgan topshiriq asosida terakt rejalashtirgan jangarilar yo‘q qilindi

Rossiya Federal xavfsizlik xizmati Volgograd shahrida Suriyadagi terrorchilar ko‘rsatmasi asosida terakt rejalashtirgan ikki nafar jangarini yo‘q qildi. Bu haqda “Interfaks” xabar berdi.

Ma’lum qilinishicha, Rossiyada taqiqlangan “Tavhid va jihod” katibasi xalqaro terrorchilik tashkilotining mintaqalararo hujrasi faoliyatiga chek qo‘yildi. Yo‘q qilingan jangarilar Markaziy Osiyo mamlakatlaridan birining fuqarolari hisoblanadi. Ular Volgogradda terrorchilik harakati uyushtirishni rejalashtirgan.

Terrorchilik faoliyatini muvofiqlashtirish Suriyadan amalga oshirilgan. Maxsus xizmatlar xabariga ko‘ra, jangarilar hokimiyat organlari binolariga, harbiy xizmatchilarning yashash joylariga hamda portlash va yong‘in xavfi bo‘lgan korxonalarga hujum uyushtirishni rejalashtirgan.

Qo‘lga olish chog‘ida jangarilar Volgograddagi maxfiy hujradan terakt uchun tayyorlangan vositalarni olib chiqishga uringan va Federal xavfsizlik xizmati xodimlariga qarshilik ko‘rsatgan. Ular FXX tomonidan yo‘q qilingan.

Jangarilarning yashash joyida o‘qotar qurollar, o‘q-dorilar, kimyoviy va zararlovchi moddalar hamda qo‘lbola portlovchi vositalar, diniy xarakterdagi adabiyotlar, shuningdek, Volgogradning terakt rejalashtirilgan joylari belgilangan xaritasi topilgan.

Shuningdek, bir vaqtning o‘zida Moskva, Sankt-Peterburg, Ufa, Maykop va Volgogradda boshqa terrorchilik guruhlari a’zolari qo‘lga olingan.