Lufthansa Technik kompaniyasining kasaba uyushmasi kompaniya rahbariyatini Belarus prezidenti Aleksandr Lukashenkoning rasmiy tashriflari uchun foydalaniladigan samolyotlardan biriga texnik xizmat ko‘rsatishdan bosh tortishga chaqirdi. Bu haqda Belarus demokratik kasaba uyushmalari kongressining raisi Aleksandr Yaroshukka tayanib, Meduza xabar berdi.
Uning so‘zlariga ko‘ra, kongressga Germaniyaning xizmat ko‘rsatish sohasi xodimlari kasaba uyushmalari birlashmasi Verdi’dan xabar kelib tushgan. Verdi’ning tarkibiga Lufthansa Technik kompaniyasining kasaba uyushmasi ham kiradi.
Verdi tomonidan jo‘natilgan xabarga ko‘ra, Lukashenkoga tegishli Boeing 737 samolyoti 13-oktabr kuni Lufthansa Technik kompaniyasining texnik xizmatidan foydalanish uchun Gamburg shahriga uchib kelgan. Kompaniyaning kasaba uyushmasi rahbariyatni samolyotga xizmat ko‘rsatishdan bosh tortadigan xodimlarni jazolamaslikka chaqirgan.
Ma’lum qilinishicha, bunga o‘xshash holat 31 yil avval ham yuz bergan. Ruminiyaning o‘sha vaqtdagi prezidenti Nikolaye Chaushesku uning samolyoti kompaniya tomonidan ta’mirlanishi kerak bo‘lgan paytda ishchilar namoyishini bostirgan. O‘shanda kompaniya ishchilari norozilik belgisi sifatida samolyotga xizmat ko‘rsatishgan bosh tortgan. Hozir ham kasaba uyushmasi agar xodimlar Lukashenkoning samolyotiga xizmat ko‘rsatishdan bosh tortsa, kompaniya rahbariyati ularni jazolamasligini kutmoqda.
Yaroshukning ma’lum qilishicha, Lufthansa Technik Lukashenkoning samolyotiga xizmat ko‘rsatish-ko‘rsatmasligini bilmaydi. Uning so‘zlariga ko‘ra, kompaniya rahbariyati murakkab vaziyatga tushib qolgan. Shartnomaga amal qiladimi yoki ishchilar bilan bir fikrda bo‘ladimi, hozircha noma’lum.
Belarusda norozilik namoyishlari boshlanganidan keyin Germaniya Belarus muxolifatini qo‘llab-quvvatladi. Germaniya kansleri Angela Merkel Aleksandr Lukashenkoning prezidentlik saylovidagi raqibi Svetlana Tixanovskaya bilan uchrashdi. Germaniya tashqi ishlar vaziri Xayko Maas Belarus prezidenti Lukashenkoga qarshi sanksiya joriy qilish taklifini bildirdi.
Eslatib o‘tamiz, Yevropa Ittifoqi yetakchilari saylovning soxtalashtirilishi va inson huquqlari buzilishi uchun javobgar bo‘lgan Belarusning 40 nafar rasmiy shaxsiga nisbatan sanksiyalar joriy qilishga qaror qilgandi. Yevropa Ittifoqining sanksiyalariga javoban Belarus yevropalik mansabdorlarga nisbatan o‘zining sanksiyalarini joriy qildi,
Avvalroq Litva, Latviya, Estoniya, Slovakiya, Ukraina, Germaniya, Kanada, Polsha, AQSh, Shvetsiya, Norvegiya, Buyuk Britaniya va Yevropa Ittifoqi Lukashenkoni Belarusning qonuniy prezidenti sifatida tan olishdan bosh tortgandi.
Izoh (0)