AQSh prezidenti Donald Tramp saylovoldi kampaniyasida askarlarni uyga qaytarish bo‘yicha bergan va’dasini bajarish maqsadida Somalidagi Amerika qo‘shinlarini olib chiqib ketish niyatida. Bu haqda Bloomberg nashriga tayanib, “Kommersant” xabar berdi.
Ta’kidlanishicha, Tramp bu boradagi g‘oyasini o‘z maslahatchilariga ma’lum qilgan. Pentagon hozirda qo‘shinni olib chiqib ketish rejasini tayyorlashga kirishgan.
AQShning Afrika qo‘mondonligi ma’lumotlariga ko‘ra, Somalida 650-800 nafar atrofida amerikalik harbiy xizmatchilar, jumladan, Somali armiyasini tayyorlayotgan maxsus operatsiya kuchlari xodimlari ham bor. Somaliga terrorchilarga qarshi kurashish doirasida qo‘shimcha kuchlar 2017-yilda Trampning buyrug‘iga ko‘ra jo‘natilgan. Qo‘shinning olib chiqib ketilishi mintaqada “Ash-Shabob” terrorchilik guruhining mustahkamlanishiga olib kelishi mumkin.
Eslatib o‘tamiz, avvalroq Donald Tramp Afg‘oniston, Germaniya, Suriyadagi harbiylar sonini qisqartirishga va’da bergan. Avgust oxirlarida The Wall Street Journal gazetasi AQSh yaqin ikki-uch oy ichida Iroqdagi harbiy xizmatchilari sonini 3,5 ming kishigacha qisqartirishini ma’lum qilgan. Avgust boshlarida esa Tramp AQShning Afg‘onistondagi kontingentini ikki baravarga qisqartirish to‘g‘risidagi qarorini e’lon qilgandi.
Izoh (0)