AQSh prezidenti Donald Tramp unda COVID-19’ga nisbatan immunitet paydo bo‘lgani sababli, saylovchilarni o‘pib-o‘pib olishga va’da berdi, deb yozadi “RIA Novosti”.
“Menda hozir immunitet bor. Minbardan tushib, hammani o‘pib-o‘pib olishim mumkin. Hammani — erkakni ham, ayolni ham o‘paman. Anavi yigitga qarang, qanday yoqimtoy. Uni ham o‘paman. Bundan huzur qilmayman, albatta, ammo bu normal holat”, — dedi Tramp Pensilvaniyada o‘z tarafdorlari qarshisida nutq so‘zlarkan.
Olimlar fikricha, COVID-19 bilan og‘rib o‘tgan odam, haqiqatan ham, immunitetga ega bo‘ladi, ammo immunitet ma’lum bir vaqtgina saqlanib qolishi mumkin. Shuningdek, immuniteti bor odam virusning boshqa odamlarga yuqishida vositachilik qilish-qilmasligi ham oxirigacha o‘rganilmagan.
Avvalroq AQSh prezidenti Donald Trampning koronavirusga topshirgan so‘nggi testlari natijasi salbiy chiqqani xabar berilgan edi.
Eslatib o‘tamiz, Donald Tramp va uning rafiqasi Melaniyada 2-oktabr kuni koronavirusga topshirgan test javobi ijobiy chiqqan. So‘ng u Uolter Rid nomidagi milliy harbiy tibbiyot markazida davolangan. Shon Konlining ma’lum qilishicha, Trampning organizmida kislorod darajasi 93 foizgacha tushib ketganidan so‘ng deksametazon qo‘llanilgan. Shifokorlar steroidni 3-oktabr kuni remdesivir preparatining ikkinchi dozasi bilan birga qo‘llashni boshlagan, Trampda ikkilamchi ta’sirlar aniqlanmagan.
Izoh (0)