Tog‘li Qorabog‘ga Turkiyaga aloqador yuzlab suriyalik jangarilar ko‘chirib o‘tkazildi. Bu haqda The Wall Street Journal gazetasi Suriyadagi manbalariga tayanib xabar qildi.
“Suriyalik jangarilarning yuzlab a’zolari Turkiya bilan ittifoqchilikda Ozarbayjon va Armaniston o‘rtasida Tog‘li Qorabog‘ tufayli bo‘lib o‘tayotgan janglarga qo‘shildi, yana yuzlab nafari jo‘nashga tayyorlanmoqda”, — deya ma’lum qildi nashrga Suriyada jangarilarning ko‘chirib o‘tkazilishiga aloqador ikki manba.
Turkiya jangarilarni yollayotgani haqidagi ma’lumot iyulda, hududda yana janglar avj olgach tarqalgan edi, dedi gazeta manbalari.
Ulardan birining so‘zlariga ko‘ra, jangarilar Qorabog‘ga sentabr o‘rtalaridan buyon har biri yuz kishilik guruhlarga bo‘lingan holda jo‘nab ketmoqda. Isyonchilar bilan bog‘liq yana bir suriyalikning tasdiqlashicha, hududga yuz kishi jo‘nab ketgan, ammo “ularning o‘nlab nafari shafqatsiz janglardan tashvishga tushgan holda qaytib kelgan”.
Isyonchilardan biri nashrga ma’lum qilishicha, janglardagi ishtiroki uchun yollanma jangchilar oyiga 2 ming dollar oladi. Boshqasining ta’kidlashicha, suriyalik jangchilar orasidagi talafot tez o‘smoqda va 200 ga yaqini ularni ortga qaytarishni so‘ragan.
Turkiya rasmiy shaxslari orasidagi manbalar Anqara Ozarbayjonda ikki haftalik harbiy mashg‘ulotlarni tashkillashtirganini va “Ozarbayjon hukumatiga zarbdor uchuvchisiz qurilmalarni taqdim etgani”ni nashrga ma’lum qildi. AQSh mudofaa vazirligi ma’lumotlariga ko‘ra, Turkiya avval ham 5 mingga yaqin suriyalik jangarilarni Liviyaga yuborgan.
“Liviya yoki Ozarbayjonga yuborish oddiy holga aylandi. Kimning tomonida turib yoki kimga qarshi jang qilish odamlarni ortiq qiziqtirmaydi, endi ular faqat pul haqida so‘raydi. Ular pul bor joyga ketaveradi”, — dedi yollanma jangchilardan biri.
Turkiya Suriyadan jangarilarni Tog‘li Qorabog‘ga ko‘chirib o‘tkazgani haqidagi ayblovlarni rad etdi. Ozarbayjon ham janglarga chet ellik yollanma jangchilarni jalb etmaganini ma’lum qildi.
Eslatib o‘tamiz, Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.
Izoh (0)