АҚШ президенти Дональд Трамп сайловолди кампаниясида аскарларни уйга қайтариш бўйича берган ваъдасини бажариш мақсадида Сомалидаги Америка қўшинларини олиб чиқиб кетиш ниятида. Бу ҳақда Bloomberg нашрига таяниб, «Коммерсантъ» хабар берди.
Таъкидланишича, Трамп бу борадаги ғоясини ўз маслаҳатчиларига маълум қилган. Пентагон ҳозирда қўшинни олиб чиқиб кетиш режасини тайёрлашга киришган.
АҚШнинг Африка қўмондонлиги маълумотларига кўра, Сомалида 650-800 нафар атрофида америкалик ҳарбий хизматчилар, жумладан, Сомали армиясини тайёрлаётган махсус операция кучлари ходимлари ҳам бор. Сомалига террорчиларга қарши курашиш доирасида қўшимча кучлар 2017 йилда Трампнинг буйруғига кўра жўнатилган. Қўшиннинг олиб чиқиб кетилиши минтақада «Аш-Шабоб» террорчилик гуруҳининг мустаҳкамланишига олиб келиши мумкин.
Эслатиб ўтамиз, аввалроқ Дональд Трамп Афғонистон, Германия, Суриядаги ҳарбийлар сонини қисқартиришга ваъда берган. Август охирларида The Wall Street Journal газетаси АҚШ яқин икки-уч ой ичида Ироқдаги ҳарбий хизматчилари сонини 3,5 минг кишигача қисқартиришини маълум қилган. Август бошларида эса Трамп АҚШнинг Афғонистондаги контингентини икки бараварга қисқартириш тўғрисидаги қарорини эълон қилганди.
Изоҳ (0)