Qashqadaryo viloyatining Shahrisabz shahrida soxta DXX xodimi 7 yilga ozodlikdan mahrum qilindi. Bu haqda Jinoyat ishlari bo‘yicha Shahrisabz shahar sudi raisi Laziza Rasulovaga tayanib, shahar hokimligi axborot xizmati ma’lum qildi.
Ta’kidlanishicha, viloyatning Kitob tumanida yashovchi 24 yoshli Furqat (ismlar o‘zgartirilgan) harbiy kiyim va soxta guvohnoma tayyorlab, o‘zini “DXX xodimi” deb atagan holda, avvaldan tuzilgan rejasini amalga oshirish uchun Shahrisabz shahridan ijaraga uy olgan.
Dastlab uy egasining ishonchiga kirib, xonadon egasiga DXXning Shahrisabz shahar bo‘limida ishlashini aytib, akasining O‘zbekiston va Qozog‘iston chegarasini qo‘riqlash vaqtida otishmada yaralanganligi, shuning uchun otasi undan pul so‘raganligi haqida aytgan. Uy egasi Farida Yusupovadan oylik maoshi kelguniga qadar 1000 dollar qarz olgan, ammo qaytarib bermagan.
Shu bilan birga, u jinoiy ishlarini davom ettirib, 2020-yil may oyiga qadar Shahrisabz shahri, Kitob va Nishon tumanlarida yashovchi fuqarolarni aldab, ularning pullarini o‘zlashtirgan.
Soxta DXX xodimi 2020-yil 19-may kuni qo‘lga olinib, unga nisbatan qamoq ehtiyot chorasi qo‘llanilgan.
Jinoyat ishlari bo‘yicha Shahrisabz shahar sudi 2020-yil 3-sentabr kuni ushbu jinoyat ishini ko‘rib chiqib, jabrlanuvchilarga yetkazilgan zarar qoplanmaganligi va ularning da’vosi borligini inobatga olib, soxta xodimga 7 yil ozodlikdan mahrum qilish jazosini tayinlagan.
Izoh (0)