Қашқадарё вилоятининг Шаҳрисабз шаҳрида сохта ДХХ ходими 7 йилга озодликдан маҳрум қилинди. Бу ҳақда Жиноят ишлари бўйича Шаҳрисабз шаҳар суди раиси Лазиза Расуловага таяниб, шаҳар ҳокимлиги ахборот хизмати маълум қилди.
Таъкидланишича, вилоятнинг Китоб туманида яшовчи 24 ёшли Фурқат (исмлар ўзгартирилган) ҳарбий кийим ва сохта гувоҳнома тайёрлаб, ўзини «ДХХ ходими» деб атаган ҳолда, аввалдан тузилган режасини амалга ошириш учун Шаҳрисабз шаҳридан ижарага уй олган.
Дастлаб уй эгасининг ишончига кириб, хонадон эгасига ДХХнинг Шаҳрисабз шаҳар бўлимида ишлашини айтиб, акасининг Ўзбекистон ва Қозоғистон чегарасини қўриқлаш вақтида отишмада яраланганлиги, шунинг учун отаси ундан пул сўраганлиги ҳақида айтган. Уй эгаси Фарида Юсуповадан ойлик маоши келгунига қадар 1000 доллар қарз олган, аммо қайтариб бермаган.
Шу билан бирга, у жиноий ишларини давом эттириб, 2020 йил май ойига қадар Шаҳрисабз шаҳри, Китоб ва Нишон туманларида яшовчи фуқароларни алдаб, уларнинг пулларини ўзлаштирган.
Сохта ДХХ ходими 2020 йил 19 май куни қўлга олиниб, унга нисбатан қамоқ эҳтиёт чораси қўлланилган.
Жиноят ишлари бўйича Шаҳрисабз шаҳар суди 2020 йил 3 сентябрь куни ушбу жиноят ишини кўриб чиқиб, жабрланувчиларга етказилган зарар қопланмаганлиги ва уларнинг даъвоси борлигини инобатга олиб, сохта ходимга 7 йил озодликдан маҳрум қилиш жазосини тайинлаган.
Изоҳ (0)