Namangan viloyati hokimining qishloq va suv xo‘jaligi masalalari bo‘yicha o‘rinbosari Tohirjon Rapiqov Vazirlar Mahkamasi kotibiyat mudiri etib tayinlandi. Bu haqda “Daryo” muxbiri Azizbek Abduvaliyev xabar bermoqda.
U Vazirlar Mahkamasida agrar va oziq-ovqat sohalarini rivojlantirish masalalari kotibiyatini boshqaradi. Tohirjon Rapiqov mazkur lavozimda Qashqadaryo viloyatining Qamashi tumaniga hokim etib tayinlangan Botir Tog‘ayevning o‘rnini egalladi.
Rapiqov 1974-yilda Chust tumanida tug‘ilgan. 1996-yilda Namangan sanoat-texnologiya institutini tamomlagan.
Mehnat faoliyatini 1996-yilda Chust tumani agroxizmat uyushmasi mutaxassisligidan boshlagan. 1997—2000-yillarda tuman qishloq va suv xo‘jaligi boshqarmasi yetakchi va bosh mutaxassisi, 2000—2005-yillarda statistika bo‘limi bosh mutaxassisi va boshlig‘i, 2005—2007-yillarda tuman hokimining iqtisodiyot va ijtimoiy rivojlantirish masalalari bo‘yicha o‘rinbosari bo‘lib ishlagan.
2007—2009-yillarda Namangan viloyati hokimligining axborot-tahlil guruhi rahbari, 2009—2016-yillarda Yangiqo‘rg‘on tumani, 2016—2019-yillarda esa Mingbuloq tumani hokimi bo‘lgan.
Tohirjon Rapiqov 2019-yildan hozirgacha Namangan viloyati hokimining qishloq va suv xo‘jaligi masalalari bo‘yicha o‘rinbosari vazifasida ishlab kelayotgandi.
Izoh (0)