COVID-19 pandemiyasi tufayli yuzaga kelgan jahon inqirozi dunyoda 100 milliondan ortiq kishi elektr energiyasidan foydalana olmay qolishiga olib kelishi mumkin. Bu haqda Xalqaro energetika agentligining (XEA) World Energy Outlook 2020 ma’ruzasida aytiladi, deb yozadi “Kommersant”.
XEA hisob-kitoblariga ko‘ra, Saxaradan janubdagi Afrika mamlakatlarida elektr energiyasidan foydalanish imkoniyati bo‘lmagan odamlar soni 2019-yilda qariyb 580 millionga teng bo‘lgan. Joriy yilda bu raqam ko‘payishi mumkin.
“Bunga qo‘shimcha ravishda taxmin qilishimizcha, 2020-yilda butun dunyoda qashshoqlik darajasining o‘sishi allaqachon elektr tarmog‘iga ulangan 100 milliondan ziyod odam uchun elektr ta’minoti bo‘yicha asosiy xizmatlardan foydalanish imkoniyatini yo‘qqa chiqarib qo‘yishi mumkin, bu esa ushbu uy xo‘jaliklarini yana havoni ko‘proq ifloslantiruvchi va samarasiz energiya manbalariga tayanishga majbur qiladi”, — deyiladi ma’ruzada.
Dunyo bo‘ylab 35,8 milliondan ziyod kishi koronavirusga chalingan, 26 milliondan ortig‘i sog‘aygan, 1 milliondan ko‘pi vafot etgan. Eng ko‘p kasallanganlar AQSh, Hindiston va Braziliyadadir.
Izoh (0)