Tinchlik bo‘yicha Nobel mukofoti BMTning Butunjahon oziq-ovqat dasturiga berildi

Nobel qo‘mitasi Osloda tinchlik bo‘yicha 2020-yilgi mukofot sohibini e’lon qildi, deb xabar bermoqda Meduza. Mukofotga Butunjahon oziq-ovqat dasturi (World Food Programme) — ocharchilikka qarshi kurashuvchi yirik tashkilot munosib deb topildi.

Dunyo bo‘ylab ocharchilikdan aziyat chekayotganlarga oziq-ovqat yetkazib beradigan BMTning insonparvarlik tashkiloti — Butunjahon oziq-ovqat dasturi (World Food Programme (WFP) 2020-yilgi Nobel tinchlik mukofoti sohibi deb topildi.

BMTning oziq-ovqat yetkazib beradigan insonparvarlik tashkiloti ocharchilik bilan kurashish borasidagi sa’y-harakatlari, mojaro zonalarida tinchlik o‘rnatish uchun sharoit yaratishga qo‘shgan hissasi va ochlikdan urush va mojaro quroli sifatida foydalanilishining oldini olishga qaratilgan harakatlari uchun mukofotlangan.

Nobel qo‘mitasi bayonotida ma’lum qilinishicha, 2019-yilda Butunjahon oziq-ovqat dasturi ochlikdan aziyat chekayotgan 88 mamlakatda qariyb 100 million kishiga yordam berdi.

Tinchlik mukofoti — Nobel siklidagi oxirgisidan bitta oldingi va Stokgolmda emas, Osloda e’lon qilinadigan yagona sovrin. 12-oktabr kuni esa iqtisodiyot yo‘nalishida mukofotni kim qo‘lga kiritgani ma’lum bo‘ladi. Bunga qadar tibbiyot, fizika, kimyo va adabiyot bo‘yicha Nobel mukofotining 2020-yildagi sohiblari nomi ma’lum qilindi.

2019-yilda Nobel tinchlik mukofoti Efiopiya bosh vaziri Abiy Ahmad Aliga, qo‘shni Eritreya bilan chegara mojarosini hal qilish bo‘yicha qat’iy tashabbusi uchun berilgan.

Nobel qo‘mitasi qoidalariga ko‘ra, mukofot olishga potensial nomzodlar ro‘yxati sir saqlanadi. Ammo qator OAVlar yil davomida tinchlik mukofotiga ba’zi mashhur prezident va siyosatchilar ilgari surilgani haqida xabar bergan. Xususan, Rossiya prezidenti Vladimir Putin tinchlik bo‘yicha Nobel mukofotiga nomzod qilib ko‘rsatilgan, 19-sentabr kuni esa rossiyalik olim, Nyu-Jersidagi Ratgers universiteti professori Sergey Yerofeyev siyosatchi Aleksey Navalniy Nobel mukofotiga nomzod qilib ko‘rsatilganini ma’lum qilgandi.