Qashqadaryo hokimi Zoir Mirzayev viloyatdagi mavjud 16 ta mahalla va oilani qo‘llab-quvvatlash bo‘limi boshlig‘ining birinchi o‘rinbosarlariga hokim maslahatchisi maqomini berdi va ularga ajratilgan xizmat avtomobillarini tantanali ravishda topshirdi. Bu haqda “Daryo” muxbiri xabar berdi.
Ta’kidlanishicha, 12-oktabr kuni viloyat rahbari Zoir Mirzayev viloyat musiqali drama teatri yonida mavjud 16 nafar hokim maslahatchisining 15 nafariga Nexia-3, viloyat hokimi o‘rinbosariga esa Tracker avtomobilini topshirgan.
“Bunday yuksak ehtirom va e’tibordan judayam xursandmiz. Boisi bu hali hech qaysi viloyatda qilinmagan ish. Shu bois ham biz bunday ishonchga munosib javob qaytarishimiz kerak”, — deydi Dehqonobod tuman mahalla va oilani qo‘llab-quvvatlash bo‘limi boshlig‘ining birinchi o‘rinbosari Mehri Yo‘ldosheva.
Viloyat hokimligi axborot xizmati rahbari Ahror Sodiqovning aniqlik kiritishicha, mazkur amaliyot O‘zbekistonda birinchi marotaba Qashqadaryoda amalga oshirilayotgan bo‘lib, Prezident Shavkat Mirziyoyev raisligida 2020-yil 8-oktabr kuni bo‘lib o‘tgan jamiyatda ayollar va yoshlarning rolini oshirish hamda bandligini ta’minlash chora-tadbirlari muhokamasiga bag‘ishlangan videoselektorda bu haqda topshiriq berilgan.
Tadbirda so‘z olgan viloyat hokimi Zoir Mirzayevning ma’lumot berishicha, ayni kunda viloyatda 2960 nafar ayol mas’ul lavozimda faoliyat yuritadi.
Eslatib o‘tamiz, viloyatda mavjud 15 ta tuman va shahar hokimi maslahatchilari va viloyat hokimi maslahatchisi Komila Karomova faoliyat yuritadi.
Mavzuga doir:
Izoh (0)