Қашқадарё ҳокими Зоир Мирзаев вилоятдаги мавжуд 16 та маҳалла ва оилани қўллаб-қувватлаш бўлими бошлиғининг биринчи ўринбосарларига ҳоким маслаҳатчиси мақомини берди ва уларга ажратилган хизмат автомобилларини тантанали равишда топширди. Бу ҳақда «Дарё» мухбири хабар берди.
Таъкидланишича, 12 октябрь куни вилоят раҳбари Зоир Мирзаев вилоят мусиқали драма театри ёнида мавжуд 16 нафар ҳоким маслаҳатчисининг 15 нафарига Nexia-3, вилоят ҳокими ўринбосарига эса Tracker автомобилини топширган.
«Бундай юксак эҳтиром ва эътибордан жудаям хурсандмиз. Боиси бу ҳали ҳеч қайси вилоятда қилинмаган иш. Шу боис ҳам биз бундай ишончга муносиб жавоб қайтаришимиз керак», — дейди Деҳқонобод туман маҳалла ва оилани қўллаб-қувватлаш бўлими бошлиғининг биринчи ўринбосари Меҳри Йўлдошева.
Вилоят ҳокимлиги ахборот хизмати раҳбари Аҳрор Содиқовнинг аниқлик киритишича, мазкур амалиёт Ўзбекистонда биринчи маротаба Қашқадарёда амалга оширилаётган бўлиб, Президент Шавкат Мирзиёев раислигида 2020 йил 8 октябрь куни бўлиб ўтган жамиятда аёллар ва ёшларнинг ролини ошириш ҳамда бандлигини таъминлаш чора-тадбирлари муҳокамасига бағишланган видеоселекторда бу ҳақда топшириқ берилган.
Тадбирда сўз олган вилоят ҳокими Зоир Мирзаевнинг маълумот беришича, айни кунда вилоятда 2960 нафар аёл масъул лавозимда фаолият юритади.
Эслатиб ўтамиз, вилоятда мавжуд 15 та туман ва шаҳар ҳокими маслаҳатчилари ва вилоят ҳокими маслаҳатчиси Комила Каромова фаолият юритади.
Изоҳ (0)