O‘zbekiston Jurnalistlari ijodiy uyushmasi raisi, jurnalist va shoir Sa’dulla Hakimov 69 yoshida vafot etdi. Bu haqda uyushma matbuot xizmati xabar berdi.
“O‘zbekiston Jurnalistlari ijodiy uyushmasi nomidan marhumning oila a’zolari va yaqinlariga chuqur ta’ziya bildiramiz”, — deyiladi uyushma axborotida.
Sa’dulla Hakimov 1951-yil 25-martda Jizzax viloyatining Forish tumanida tug‘ilgan.
Mehnat faoliyatini G‘allaorol tumanida o‘qituvchilikdan boshlagan Sa’dulla Hakimov turli yillarda “O‘zbekistonda sotsial ta’minot” jurnalida, “O‘zbekiston adabiyoti va san’ati”, “O‘zbekiston ovozi” va “Ma’rifat” gazetalarida, O‘zbekiston Respublikasi Prezidenti devonida, O‘zbekiston Milliy axborot agentligida, “Turkiston-press” nodavlat axborot agentligida mehnat qilgan. Jurnalist sifatida dolzarb mavzudagi maqolalari gazeta va jurnallar sahifalarida muntazam chop etib turilgan.
2016-yilning 29-dekabridan buyon O‘zbekiston Jurnalistlari ijodiy uyushmasi raisi lavozimida ishlab kelayotgan edi.
Sa’dulla Hakim taniqli shoir sifatida ham o‘zbek adabiyotiga munosib hissa qo‘shdi. “Hamal tonglari” (1981), “Sen kutgan bahor” (1986), “Yoz oqshomi” (1996), “Ona so‘z” (2000), “Saylanma” (2001), “Ko‘ngil yuzi” (2006), “Ko‘hna naql” (2011) kabi she’riy kitoblari nashr qilingan. Gyote, Pushkin, Lermontov, Yesenin, Yunus Emro kabi shoirlarning she’rlarini o‘zbek tiliga tarjima qilgan.
“Saylanma” kitobi uchun 2002-yil “Eng ulug‘, eng aziz” Respublika tanlovi g‘olibi bo‘lgan. Vaqtli matbuotda ma’naviy hayotimizga oid ko‘plab maqola va ocherklari e’lon qilingan. “Esimda qolgan kunlar”, “Atom qa’riga sayohat” kabi publitsistik asarlari chop etilgan.
Sa’dulla Hakimovning uzoq yillik mehnatlari davlatimiz tomonidan munosib taqdirlanib, “O‘zbekiston Respublikasida xizmat ko‘rsatgan madaniyat xodimi” faxriy unvoni (2002-yil), “Mehnat shuhrati” ordeni (2019-yil) bilan mukofotlangan.
Izoh (0)