O‘zbekiston ilmiy-tadqiqot markazlari vakillari hamda Buyuk Britaniyadagi Ibn Sino va Moturidiy nomidagi kollejlar direktori va asoschisi shayx Otabek Shukurov ishtirokida onlayn seminar o‘tkazildi. Bu haqda “Dunyo” axborot agentligi xabar berdi, deb yozmoqda “Xalq so‘zi online”.
Ma’lum qilinishicha, 2017-yilda Manchester shahrida tashkil etilgan Ibn Sino va Moturidiy nomidagi kollejlar hadisshunoslik, Islom huquqshunosligi va an’anaviy tibbiyot sohasida mutaxassislar tayyorlaydigan notijorat tashkilotlari hisoblanadi. Shuningdek, kollej mutaxassislari din tarixi, qadimgi qo‘lyozmalarni o‘rganish, muqaddas yozuvlarni tahlil qilish, fiqh va Islom moliyasi yo‘nalishlarida tadqiqotlar olib boradi. Ibn Sino nomidagi kollejda Abu Rayhon Beruniy nomidagi laboratoriya ham faoliyat yuritadi. Unda mutaxassislar Ibn Sino ilmiy merosi asosida yangi dori-darmonlar yaratish ustida ish olib boradi.
O‘zbekistonning Buyuk Britaniyadagi elchixonasi ko‘magida tashkil etilgan tadbirda O‘zbekiston ilmiy-tadqiqot markazlari rahbarlari, taniqli ekspertlar va dinshunos olimlar ishtirok etdi.
Tomonlar O‘zbekiston ilmiy-tadqiqot markazlari va institutlari hamda Ibn Sino va Moturidiy nomidagi kollejlar o‘rtasida Islom dini va kalom ilmi rivojiga beqiyos hissa qo‘shgan Imom Moturidiy, shuningdek, Movarounnahrda yashab o‘tgan boshqa buyuk allomalarning ilmiy, diniy va ma’naviy merosini o‘rganish bo‘yicha qo‘shma ilmiy va ta’lim loyihalarini amalga oshirish yuzasidan hamkorlik aloqalarini o‘rnatish masalalarini muhokama qildi.
“O‘zbekistonlik mutaxassislar mamlakatda Imom Moturidiy merosini chuqur o‘rganish, shuningdek, uning e’tiqodni mustahkamlash, milliy va diniy qadriyatlarni saqlash va rivojlantirishga qo‘shgan beqiyos hissasini keng targ‘ib qilish va shu asosda yosh avlodni ezgu umuminsoniy g‘oyalar ruhida tarbiyalash, yigit-qizlarni yot g‘oyalar ta’siridan saqlash borasida amalga oshirilayotgan ishlar to‘g‘risida ma’lumot berdi”, — deyiladi xabarda.
O‘z navbatida, Ibn Sino va Moturidiy nomidagi kollejlarning direktori va asoschisi o‘zi rahbarlik qilayotgan ta’lim muassasalari faoliyati, shuningdek, ular negizida Buyuk Britaniyada buyuk o‘zbek olimi va astronomi Mirzo Ulug‘bek nomidagi yangi universitet tashkil qilishni rejalashtirayotgani haqida so‘zlab berdi.
Yangi universitet tarkibida Markaziy Osiyoda o‘rta asrlarda yashagan va faoliyat yuritgan Ibn Sino, Abu Rayhon Beruniy, Imom Moturidiy, Muhammad Xorazmiy, Mirzo Ulug‘bek, boshqa taniqli olimlar va mutafakkirlarning ilmiy, diniy va ma’naviy merosini o‘rganish hamda xalqaro ko‘lamda targ‘ib qilishga ixtisoslashgan fakultetlar hamda kollejlarni ochish nazarda tutilgan.
Otabek Shukurov bo‘lajak universitet ilohiyot va an’anaviy tibbiyot bo‘yicha bakalavr darajasini olish uchun grant va shartnoma asosida chet eldan talabalarni qabul qilishini ta’kidladi. O‘zbekistonning ixtisoslashgan oliy ta’lim muassasalari talabalari ham ushbu o‘quv dasturlarida qatnashish imkoniyatiga ega bo‘ladi. Bundan tashqari, ushbu universitetda ingliz tilida so‘zlashadigan o‘zbekistonlik dinshunos olimlar ham dars berishi mumkin. Yevropa mamlakatlari, AQSh, Kanada, Turkiya va Marokashning yetakchi oliy o‘quv yurtlarida leksiyalar o‘qiydigan olim O‘zbekistonning diniy ta’lim muassasalarining talabalari va o‘qituvchilari huzurida ham ilmiy chiqishlar qilishga tayyorligini ma’lum qildi.
Veb-seminar doirasida o‘zaro ilmiy aloqalarni rivojlantirish, xususan, Imom Moturidiy asarlarining insonparvarlik mohiyati va ma’naviy-ma’rifiy ahamiyatini o‘rganish maqsadida qo‘shma tadqiqotlar olib borish, ularning mazmun-mohiyatini oddiy va ta’sirchan vositalarda keng jamoatchilik e’tiboriga yetkazish to‘g‘risida kelishuvga erishildi.
Markaziy Osiyo buyuk mutafakkirlarining O‘zbekiston va xorijiy davlatlardagi kutubxonalar, arxiv fondlari hamda shaxsiy kolleksiyalarda saqlanayotgan qo‘lyozmalarini izlab topish, to‘plash va o‘rganish hamkorlikning istiqbolli yo‘nalishlari sifatida belgilandi.
Izoh (0)