Haftalik dayjest: Puli talangan “Jaloliddin”, salqinda oynani qoraytiramizmi, kimlar daromadini deklaratsiyalaydi?

Bu hafta xalqimiz hayotiga daxldor yangiliklarga boy bo‘ldi. Dayjestimizni boshladik.

Hafta davomida tarqalgan bir video jamoatchilikning ta’bini tirriq qildi. Gap eri zo‘ravonlik qilib bolasining axlatini yedirgan ayol haqida ketmoqda. Ushbu video jamiyatda ayollarning qadri, o‘rni kabi masalalarni yana muhokama mavzusiga aylantirdi. Bu qadar jirkanch ishga o‘z ayolini majburlab, yana videoga oldirgan erkak nomiga ko‘plab darg‘azab ayblovlar yangradi. Ma’lum bo‘lishicha, bu oila Toshkent shahrining Mirzo Ulug‘bek tumanida yashaydi. 46 yoshli er ayolini muttasil kaltaklab, qiynab kelgan. Ayolga yetkazilgan tan jarohatlarining og‘irligini aniqlash uchun sud-tibbiy ekspertizasi tayinlandi. Holat bo‘yicha jinoyat ishi qo‘zg‘atildi. Zo‘ravon er qo‘lga olindi.

7-oktabr kuni ayolga himoya orderi berildi. Ayni paytda ayol va uning voyaga yetmagan bolalari Og‘ir ahvolga tushib qolgan ayollarni reabilitatsiya qilish va moslashtirish markaziga vaqtincha joylashtirildi. Erkak uch yilgacha qamalishi mumkin.

* * *

Katta shov-shuvlar bilan boshlangan “Mendirman Jaloliddin” seriali loyihasining ortidan g‘avg‘o chiqdi. Katta loyihaning katta puli talon-toroj qilingani aytilmoqda. Ma’lum qilinishicha, Bosh prokuratura tomonidan “O‘zbekkino” Milliy agentligi mansabdor shaxslariga nisbatan Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yoki rastrata yo‘li bilan talon-toroj qilish) va boshqa moddalari bilan qo‘zg‘atilgan jinoyat ishi bo‘yicha dastlabki tergov harakatlari olib borilmoqda. Ushbu jinoyat ishi qo‘zg‘atilishiga Moliya vazirligining Davlat moliyaviy nazorati departamenti mutaxassislari tomonidan “O‘zbekkino” Milliy agentligida o‘tkazilgan tekshiruv hujjatlari asos bo‘lgan.

Aytilishicha, “Mendirman Jaloliddin” serialiga davlat mablag‘i sarflanmagan, uni Orient Finans Bank moliyalashtirgan. Eng so‘nggi xabarlarga ko‘ra, serialga ajratilgan 533 million so‘m mablag‘ qaytarilgan.

* * *

Kuzning o‘rtasi yaqinlashgani sari havo salqinlashib, oynasi qoraytirilgan mashinaga tobora ehtiyoj kamayib borayotgan paytda “tonirovka” narxini arzonlashtirib qo‘yishdi. M1 (yengil avtomobillar), N1 va N2 toifaga oid yuk mashinalari orqa yon oynalarining tusini o‘zgartirishga (qoraytirishga) ruxsatnoma berish uchun to‘lov stavkalari jismoniy shaxslar uchun bazaviy hisoblash miqdorining 5 baravari (1 115 000 so‘m) etib belgilandi. Bunga qadar ushbu miqdor BHMning 10 baravari (2 230 000 so‘m) edi. Qolaversa, faqat yengil avtomobillarga oynasining tusini qoraytirishga ruxsat etilgan edi.

Yuridik shaxslar uchun orqa yon oynani qoraytirish uchun to‘lov miqdori o‘zgarmagan — BHMning 10 baravari (2 230 000 so‘m).

* * *

Hukumatni yiqitish borasida belaruslarga “master-klass” ko‘rsatayotgan Qirg‘izistonda tobora tartibsizliklar avjga minmoqda. Qo‘shning tinch – sen tinch. Qirg‘izistondagi to‘polonlar O‘zbekistonni ham xavotirga solmoqda. O‘zbekiston Tashqi ishlar vazirligi 6-oktabr kuni Qirg‘izistondagi voqealarga munosabat bildirdi. Bayonotda aytilishicha, O‘zbekiston yaqin qo‘shni va strategik sherik sifatida qardosh Qirg‘izistondagi vaziyatning mamlakat konstitutsiyasi va milliy qonunchiligi normalariga muvofiq, tez orada barqarorlashuviga umid qiladi. 8-oktabr kuni esa Turkmaniston rahbari bilan O‘zbekiston rahbari telefon orqali Qirg‘izistondagi vaziyatni muhokama qildi. Shundan keyin O‘zbekiston, Qozog‘iston, Turkmaniston va Tojikiston respublikalari prezidentlari Qirg‘izistondagi voqealar yuzasidan qo‘shma bayonot bilan chiqdi. “Qirg‘izistonning ravnaqi mintaqaviy xavfsizlik va butun Markaziy Osiyo barqaror rivojlanishining muhim omilidir. Mamlakatlarimizning o‘tmishi bir, kelajakni birgalikda barpo etadi”, deb ta’kidlangan bayonotda.

So‘nggi yillar ichida O‘zbekistonning Qirg‘iziston bilan aloqasi ancha iliqlashdi, chegara bahslarining bir qismi yechildi. Kunchiqardagi qo‘shnilar bilan savdo aloqalari mavjud. O‘zbekiston qishloq xo‘jaligi texnikasi va maishiy texnika, avtomobillar sotsa, qirg‘iz tomoni oziq-ovqat, jumladan, sut, go‘sht mahsulotlari yetkazib beradi. Farg‘ona vodiysi aholisi Qirg‘izistondan uchinchi davlatda ishlab chiqarilgan mahsulotlarni xarid qiladi, bundan tashqari, qo‘shni davlatda o‘zbek mehnat muhojirlari bor.

* * *

Agar metro uchun avvaldan bir cho‘ntak jeton xarid qilib qo‘ygan bo‘lsangiz, tezda ishlatib yuboring, chunki ular tez orada keraksiz bo‘lib qoladi. Toshkent shahar jamoat transporti — avtobus va metropoliten yo‘nalishlarida avtomatlashtirilgan to‘lov tizimi joriy etilmoqda. 3-yanvardan maxsus transport to‘lov kartalari sotuvga chiqarildi. To‘lov kartalarining narxi 11 000 so‘m. Har bir kartaga oldindan bir martalik to‘lov miqdori yuklangan. Karta orqali bir martalik yo‘l haqi 1 400 so‘m. Kartalar hisobini bank plastik kartalaridagi mablag‘ va naqd pul bilan yuqoridagi shoxobchalarda to‘ldirish imkoni bor.

Tez orada kartalar hisobini bankomatlar, kiosklar, to‘ldirish terminallari hamda mobil ilovalar orqali ham to‘ldirish imkoniyati yaratiladi. Pensionerlar, o‘quvchi-talabalar va qonunda belgilangan imtiyozga haqli fuqarolar uchun chegirmalar saqlanib qoladi.

* * *

7-oktabr tongida Sirdaryoning Guliston shahridagi Alpomish sport majmuasida tashkil etilgan koronavirusga gumon qilingan yoki kasallangan bemorlarga tibbiy yordam ko‘rsatish, saralash va taqsimlash markazida kislorod balloni portladi. Mutaxassislarning aytishicha, portlash kelib chiqishiga ballonlardagi kislorodga moy qoldiqlarining aralashgani sabab bo‘lgan. Favqulodda vaziyatlar vazirligi Gulistondagi portlash oqibatida fuqarolarga tan jarohati yetgan, vafot etganlar yo‘q, deb axborot berdi. Portlash to‘lqini bino devori va oynalarini sindirib tashlagan. Portlash yuzasidan jinoiy ish qo‘zg‘atildi.

Bu portlash koronavirus bemorlarini davolayotgan markazlarni sergaklikka chorladi. Xususan, Namangan hokimi koronavirus bemorlari davolanayotgan shifoxonalarning xavfsizlik holatini ko‘zdan kechirib chiqdi.

Qizig‘i, Sirdaryodagi portlash oqibatlari rasmi ijtimoiy tarmoqlarda tarqalib, koronabemorlar soni viloyat berayotgan rasmiy statistikadan ko‘proqligi sezilib qoldi.

Umuman olganda, bemorlar sonini kamaytirib ko‘rsatish birgina Sirdaryoda deb bo‘lmaydi. @davletovuz kanalini o‘qib ko‘ring-a:

Shu yilning 5-oktabr kunidagi rasmiy statistikaga ko‘ra, Samarqand viloyatida 143 nafar kishi koronavirus asoratlaridan davolanmoqda. Korrupsiyaga qarshi kurashish agentligi direktori Akmal Burhonovga ko‘ra, bugungi Samarqandda shifoxonalarda 1 155 nafar bemor davolanmoqda. “Kimga kerak 10 baravar qisqartirib? Balki korrupsiyamasdir. Sabablarini o‘rganishimiz kerak. Hamma viloyatlarda shu ahvolligini aniq ayta olishimiz mumkin”, deydi u.

Andijon viloyati hokimligi ma’lum qilishicha, 7-oktabrda viloyatda COVID-19 bemorlari uchun hozirgi kunda jami 2 152 ta maxsus jihozlangan, kislorod bilan ta’minlangan alohida zaxira joylari mavjud. Lekin Telegram-kanallarda tarqayotgan rasmlar buning aksini ko‘rsatmoqda. Yuraging larzaga keladi. Vaholanki, Andijonda, 6-oktabr kungi rasmiy statistikaga ko‘ra, 100 nafar atrofida odam davolanmoqda, xolos...

Korrupsiyaga qarshi kurashish agentligi direktori Akmal Burhonov davlat budjetidan oylik pul oladigan barcha davlat xizmatchilari deklaratsiyalanishi lozimligi haqida gapirdi:

Bizning maqsadimiz davlat budjetidan maosh oladigan hammaning mol-mulki deklaratsiyalanishi kerak. Davlat rahbaridan tortib, hukumat rahbari, sudyalar, prokurorlar, hokimlar, vazirlik idoralari rahbarlari, boshqarma va bo‘lim boshliqlarining hammasi deklaratsiyalanadi. Faqat bu bosqichma-bosqich, ya’ni eng yuqoridan boshlab pastga qarab ketiladi. Bosqichma-bosqich amalga oshirilayotganligining sababi — tizim bo‘lishi kerakligida.

Akmal Burhonov

Sizga COVID-19 yuqqan yoki yuqmaganidan qat’i nazar, gigiyena qoidalariga rioya qiling. “Daryo”da qoling, eng yangi xabarlarni bizda o‘qing.