Qashqadaryo viloyatining Dehqonobod tumanida to‘y o‘tkazish tartibini buzgan 10 nafar fuqaroga ma’muriy bayonnoma tuzildi. Bu haqda “Daryo”ga tuman IIB boshlig‘i o‘rinbosari Dilshod Mirzayev xabar berdi.
Dilshod Mirzayevga ko‘ra, tuman IIB xodimlari tomonidan o‘tkazilgan reyd tadbirlarida 9 ta xonadon egasi to‘yiga 30 kishidan ortiq mehmon chaqirgani, tuman markazidagi to‘yxona rahbari esa to‘yxonada o‘tkazilgan to‘yda belgilangan tartibga rioya qilmagan holda ko‘p mehmon qatnashishiga ruxsat bergani ma’lum bo‘lgan.
“Aniqlangan holatlar bo‘yicha 10 nafar fuqaroga karantin qoidalarini buzgani uchun Ma’muriy javobgarlik to‘g‘risidagi kodeksning 54-modda 2-qismiga asosan ma’muriy bayonnoma rasmiylashtirilgan va hujjatlar sudga yuborilgan”, — deydi Dilshod Mirzayev.
IIB mas’uli Mirzayevning qo‘shimcha qilishicha, tumanning Oqirtma qishlog‘idagi xonadon egasi to‘yiga 250 nafar mehmon chaqirgani aniqlangan.
O‘zbekistonda koronavirus epidemiyasi tarqalishining oldini olish maqsadida 23-martdan e’tiboran ommaviy tadbirlar, xususan, to‘y-marosimlarning o‘tkazilishi taqiqlangan edi.
Mamlakatda epidemiologik vaziyat barqarorlashib, nisbatan nazorat ostiga olingach Respublika maxsus komissiyasining 30-maydagi qarori bilan “yashil” toifaga kiritilgan hududlarda oilaviy tantana, to‘y, ma’raka va marosimlarni 30 kishidan ko‘p bo‘lmagan holda o‘tkazishga ruxsat berildi.
Mamlakatda koronavirus bilan bog‘liq vaziyat keskinlashgani sababli 10-iyuldan boshlab mamlakatda to‘ylarni o‘tkazish yana taqiqlandi. 15-avgustdan boshlab 30 kishilik to‘ylarni o‘tkazishga yana ruxsat berildi.
Eslatib o‘tamiz, avvalroq IIV axborot xizmati rahbari Shohrux G‘iyosov Sirdaryo viloyatida 16 ta, Jizzaxda 21 ta, Navoiyda 32 ta, Buxoroda 48 ta, Andijonda 14 ta, Namanganda 74 ta, Qashqadaryoda 41 ta, Surxondaryoda 10 ta va Qoraqalpog‘istonda 27 ta to‘yda huquqbuzarlik aniqlanganini ma’lum qilgandi.
Izoh (0)