WSJ: Tramp koronavirusga topshirgan birinchi testining javobini yashirgan
AQSh prezidenti Donald Tramp koronavirusga topshirgan birinchi testining ijobiy javobi haqida ma’lum qilmagan. Bu haqda The Wall Street Journal gazetasi o‘z manbalariga tayanib xabar qildi, deb yozmoqda “RBK”.
Tramp test natijasi haqida 1-oktabr kuni kechki payt — Fox News telekanali efirida chiqishidan oldinroq bilgan. O‘shanda prezident COVID-19’ga topshirgan birinchi testi javobi ijobiy chiqqani haqida aytmaslikka qaror qilgan va buning o‘rniga o‘zining yordamchisi Houp Xiksda koronavirus aniqlanganini tasdiqlagan.
Bundan tashqari, Tramp test natijasini e’lon qilmaslikni o‘z yordamchilaridan biridan ham iltimos qilgan. Koronavirusni yuqtirganligi haqida Tramp rasman 2-oktabr kuni kechasi e’lon qilgan.
Oq uy xodimlari uchun amal qiladigan qoidalarga ko‘ra, ekspress-test natijasi ijobiy chiqsa, ular koronavirusni aniqlash bo‘yicha ikkinchi marta yanada aniqroq testni topshiradi.
Hozircha Oq uy bu mavzu yuzasidan izoh berganicha yo‘q.
Avvalroq AQSh prezidenti Donald Tramp o‘z tarafdorlari bilan uchrashish uchun biroz vaqtga shifoxonani tark etgani haqida xabar berilgan edi.
Eslatib o‘tamiz, Donald Tramp va uning rafiqasi Melaniyada 2-oktabr kuni koronavirusga topshirgan test javobi ijobiy chiqqan. Bundan avval Trampning maslahatchisi Houp Xiksda COVID-19 aniqlangan, shu sababli prezident oilasi bilan birgalikda Oq uyda izolyatsiya qilingandi. Trampning kasalligi tasdiqlangandan so‘ng u Uolter Rid nomidagi harbiy tibbiyot markaziga yotqizilgan.
