Ижтимоий тармоқларда Тошкент шаҳар, Мирзо Улуғбек тумани, «Оққўрғон» маҳалласида яшовчи эркак турмуш ўртоғининг устидан кулиб, унга тан жароҳати етказгани ҳақида маълумот ҳамда уни боласининг ахлатини ейишга мажбур қилгани акс этган видео тарқалди. Видеода акс этган ҳолат бўйича Тошкент шаҳар ИИББ маълумот берди.
Маълум қилинишича, мазкур видео 1 октябрдан 2 октябрга ўтар кечаси олинган. Шу тунда 102 рақамига аёлни 46 ёшли эри Рустам И. калтаклагани ва таҳқирлагани ҳақида хабар келиб тушган. Аёлга етказилган тан жароҳатларининг оғирлигини аниқлаш учун суд-тиббий экспертизаси тайинланган.
Мазкур ҳолат бўйича Мирзо Улуғбек тумани ИИО ФМБ томонидан Жиноят кодексининг 110-моддаси 1-қисми (муттасил равишда дўппослаш ёки бошқача ҳаракатлар билан қийнаш) билан жиноят иши қўзғатилган. Рустам И. қўлга олинган. Тергов ҳаракатлари давом этмоқда.
Шунингдек, 7 октябрь куни аёлга ҳимоя ордери берилган. Айни пайтда аёл ва унинг вояга етмаган болалари Оғир аҳволга тушиб қолган аёлларни реабилитация қилиш ва мослаштириш марказига вақтинча жойлаштирилган.
Маълумот учун, Жиноят кодексининг 110-моддаси 1-қисмида назарда тутилган жиноятни содир этганлик учун базавий ҳисоблаш миқдорининг 50 бараваридан 100 бараваригача миқдорда жарима ёки 360 соатгача мажбурий жамоат ишлари ёки икки йилгача ахлоқ тузатиш ишлари ёхуд бир йилдан уч йилгача озодликни чеклаш ёки уч йилгача озодликдан маҳрум қилиш билан жазо тайинланиши мумкин.
Эслатиб ўтамиз, август ойида ижтимоий тармоқларда Самарқанд шаҳрида эри томонидан аёвсиз калтакланаётгани акс этган аёл видеоси тарқалиб кетган эди. Маълум бўлишича, эр аёлни мунтазам хўрлаган ва мажбурлаб памперс едирган. Эркак турмуш ўртоғини ургани тасвирланган видео интернетда тарқалгач уйидан қочиб кетган. 23 август куни эркак Тошкентда қўлга олиниб, Самарқандга олиб кетилган. Кейинроқ Сенат мазкур аёл билан боғлиқ вазиятни ўз назоратига олганди.
Изоҳ (0)