Ukrainaning SkyUp Airlines aviakompaniyasi Toshkent va Kiyev o‘rtasida muntazam qatnovlarni yo‘lga qo‘yishni rejalashtirmoqda. Bu haqda Turizmni rivojlantirish davlat qo‘mitasi ma’lum qildi.
Ta’kidlanishicha, SkyUp Airlines muntazam qatnovlarni ikki mamlakat mintaqalari o‘rtasidagi reyslar sonini bosqichma-bosqich kengaytirish bilan yo‘lga qo‘yishni mo‘ljallagan.
Shu maqsadda Turizmni rivojlantirish davlat qo‘mitasi va Ukraina Madaniyat vazirligi huzuridagi Turizmni rivojlantirish davlat agentligi o‘rtasida videokonferensiya o‘tkazildi.
Onlayn muloqot doirasida tomonlar COVID-19 pandemiyasining turizm sohasiga ta’sirini yumshatish bo‘yicha o‘zaro tajriba almashdi va xalqaro sayyohlik qatnovlarini tiklash bo‘yicha ustuvor chora-tadbirlarni muhokama qildi.
Onlayn muloqot yakuniga ko‘ra, tomonlar O‘zbekiston va Ukraina o‘rtasida sayyohlik oqimini tiklash hamda turistik mahsulotlarni targ‘ib qilishga qaratilgan qo‘shma harakatlar dasturini ishlab chiqishga kelishib oldi.
Avvalroq Qozog‘istonning SCAT aviakompaniyasi Aqtau—Urganch—Aqtau yo‘nalishida doimiy parvozlarni amalga oshirishi haqida xabar berilgandi.
Izoh (0)