“Neftchi” futbol klubining avvalgi mavqeyi tiklanadi, “Qirguli” shaharchasida zamonaviy o‘quv yig‘ini bazasi hamda klub akademiyasi tashkil etiladi. Bu haqda Farg‘ona viloyatini ijtimoiy-iqtisodiy rivojlantirish dasturlari ijrosi va boshqa dolzarb masalalar yuzasidan o‘tkazilgan videoselektor yig‘ilishida viloyat hokimi vazifasini bajaruvchi Xayrullo Bozorov ma’lum qildi, deya xabar beradi “Daryo” muxbiri Azizjon Ermatov.
Bozorovga ko‘ra, viloyatda sportni ommalashtirish ishiga alohida e’tibor qaratiladi.
Barcha sohalar qatori viloyatimizda futbolni ham rivojlantirishimiz kerak. “Neftchi” shonli tarixga ega jamoa. Uning oldingi salohiyatini tiklashimiz lozim. “Neftchi”ni Superligaga qaytaramiz. “Istiqlol” klubi ham faoliyatini davom ettiradi.Xayrullo Bozorov, Farg‘ona viloyat hokimi vazifasini bajaruvchi
“Neftchi” — 1962-yilda tashkil etilgan klub. 1991-yilgacha “Neftyanik” nomi bilan atalgan. 1992-yildan boshlab klub nomi “Neftchi”ga o‘zgargan. Klub O‘zbekiston chempionligini 5 marta, mamlakat kubogini esa 2 bor qo‘lga kiritgan. Jamoa o‘z tarixida ilk bor 2018-yilgi mavsum yakunlariga ko‘ra, Superligada so‘nggi o‘rinni olib quyi divizion — Pro-Ligaga tushib ketgandi.
“Istiqlol” esa 2016-yilda tashkil etilgan xususiy klub hisoblanadi. Jamoa hozirga qadar Pro-Ligada ishtirok etib kelayotgandi. Biroq jamoa bir muddat avval moliyaviy inqiroz sabab faoliyatini yakunlagani haqida xabar berilgandi.
Izoh (0)