Farg‘ona viloyatini Andijon viloyati bilan bog‘lovchi Quva—Asaka, Shahrixon—Quva yo‘llaridagi blokpostlar olib tashlandi.

Foto: Quva tumani hokimligi axborot xizmati

Quva tuman hokimligi axborot xizmatining “Daryo”ga ma’lum qilishicha, Asaka va Quva tumanlarining chegara hududiga yaqin bo‘lgan yo‘lning yettinchi kilometri, Shahrixon—Quva yo‘lining beshinchi kilometrida amalga oshirilayotgan ta’mirlash ishlari yakunlangan. Shu sabab bugun 26-sentabrdan har ikki yo‘lda transportlar cheklovlarsiz harakatlanishni boshlagan.

Foto: Quva tumani hokimligi axborot xizmati

Eslatib o‘tamiz, O‘zbekistonda 2020-yil 15-avgustdan karantin cheklovlari yumshatilib, shaxsiy va jamoat transporti harakati qayta tiklangan bo‘lsa-da, shu kungacha Andijon va Farg‘ona viloyatlari o‘rtasida transport qatnovlari cheklanganicha qolayotgan edi. Asaka va Quva tumanlaridan o‘tuvchi asosiy yo‘l va Shahrixon—Quva yo‘li blokpost bilan berkitilgandi.

Foto: Quva tumani hokimligi axborot xizmati

Andijon aholisi Farg‘onaga o‘tish uchun yoki farg‘onaliklar Andijonga borish uchun O‘sh—Toshkent yo‘li bilan Bo‘ston—Yozyovon posti orqali 130 kilometr ortiqcha yo‘l yurishga majbur bo‘layotgan edi.

25-sentabr kuni Namangan viloyati hokimi Xayrullo Bozorov Farg‘ona viloyati hokimi vazifasini bajaruvchi etib tayinlangani haqida xabar berilgan edi.

2011-yildan buyon Farg‘ona viloyatiga rahbarlik qilib kelayotgan Shuhrat G‘aniyev esa O‘zbekiston bosh vazirining agrar va oziq-ovqat sohalarini rivojlantirish masalalari bo‘yicha o‘rinbosari lavozimini egallagandi.