Farg‘ona viloyati hokimligi axborot xizmati rahbari Muhammadjon Obidov pnevmoniya kasalligiga chalingani sabab 28-sentabr kuni iste’fo berdi. Bu haqda u Facebook’dagi sahifasida ma’lum qilgan.

Foto: Facebook

“17-sentabrdan buyon pnevmoniya kasalligi bilan shifoxonadaman. Biroz jiddiyroq keldi. O‘pkaning 45 foizi shikastlangan. Shuhrat G‘aniyevni kuzatish, Xayrullo Bozorovni tayinlash marosimida ham ishtirok etolmadim. Vrachlar yaxshi qarashyapti. Ammo o‘zgarish juda sust. Hokimlikning axborot xizmatini bir kun ham egasiz qoldirib bo‘lmaydi. Qolaversa, yangi hokim ish boshladi. Shuning uchun bugun bir qarorga keldim: Farg‘ona viloyati hokimligi axborot xizmati rahbarligiga iste’fo berdim. Viloyat hokimi Xayrullo Bozorov bilan ilgari ham, hozir ham uchrashmaganman. Shunday bo‘lsa-da, kasalligimni inobatga olib, avval tuzalib chiqsin yoki telefonda bir so‘zlashay, demasdan iste’fomni qabul qilibdilar. Xursand bo‘ldim.

Bir yil G‘aniyev bilan astoydil, fidoyilik va sadoqat bilan ishladim. Yangi tizim — axborot xizmati imidjini ham yaratdik. Men shu davr faoliyatim bilan faxrlanaman. G‘aniyev kuchli shaxs va buni respublika miqyosida qiladigan ishlari bilan isbotlashiga aminman.

Do‘stlar, mening iste’fomni boshqacha talqin qilmay, qanday bo‘lsa shundayligicha qabul qilasizlar, deb umid qilaman. Qo‘lingizdan kelsa, duo qilib qo‘ying”, – deb yozadi Muhammadjon Obidov.

Foto: Farg‘ona viloyat hokimligi

Muhammadjon Obidov 1951-yil 16-aprelda Farg‘ona viloyati Marg‘ilon shahrida tug‘ilgan. 1973-yili Toshkent davlat universitetining jurnalistika fakultetini tamomlagan.

U 2004-yildan buyon O‘zbekiston Jurnalistlari ijodiy uyushmasi Farg‘ona viloyat bo‘limi raisi hisoblanadi. 2020-yil 22-yanvarda viloyat hokimligi muassisligidagi “Farg‘ona haqiqati” — “Ferganskaya pravda” gazetalari birlashgan tahririyatiga ham bosh muharrir etib tayinlangan.

O‘zbekistonda xizmat ko‘rsatgan jurnalist unvoni bilan taqdirlangan. Bir necha kitoblari nashr etilgan.