Andijon viloyatidagi mavjud 764 ta maktabning 4561 nafar bitiruvchisi talaba bo‘ldi, deya xabar berdi “Daryo” muxbiri Umidjon Mamarasulov.
Viloyat xalq ta’limi boshqarmasi boshlig‘i Azizbek Mirkomilovning ma’lumot berishicha, o‘tgan o‘quv yilida viloyatdagi maktablarni 40 298 nafar yigit-qiz tamomlagan bo‘lib, shundan 38 mingtasi o‘qishini OTMda davom ettirish maqsadida hujjat topshirgan.
Bitiruvchilarning mingga yaqini fan olimpiadalari, nufuzli sport musobaqalari va ko‘rik-tanlovlarda ishtirok etib, yuqori o‘rinlarni egallagani uchun imtiyozni qo‘lga kiritgan. 2020-yil 2—13-sentabr kunlari o‘tkazilgan test sinovlari natijasiga ko‘ra, 4561 nafar bitiruvchi OTM talabasiga aylangan.
Marhamat tumanidagi 3-davlat ixtisoslashtirilgan maktab internatini direktori Mahfuza O‘rinovaning aytishicha, bu yil internatni tamomlagan 25 nafar bitiruvchining barchasi test sinovlaridan muvaffaqiyatli o‘tgan. Ularning 11 nafari davlat granti, qolgan 14 nafari esa to‘lov-shartnomasi asosida oliy ta’lim muassasalariga o‘qishga kirgan.
Qayd etilishicha, boshqarma tasarrufidagi 67 ta maktabning 190 nafar bitiruvchisi test sinovlaridan avval muddatidan avval 14 ta oliy ta’lim muassasasi talabalari safiga qabul qilingan.
Viloyat xalq ta’limi boshqarmasi axborot xizmatining eslatishicha, o‘tgan o‘quv yilida viloyatda 40 298 nafar yigit-qiz 11-sinfni tamomlagan bo‘lsa, ularning 936 nafari oltin, 643 nafari esa kumush medalga loyiq ko‘rilgan.
Izoh (0)