«Нефтчи» футбол клубининг аввалги мавқейи тикланади, «Қиргули» шаҳарчасида замонавий ўқув йиғини базаси ҳамда клуб академияси ташкил этилади. Бу ҳақда Фарғона вилоятини ижтимоий-иқтисодий ривожлантириш дастурлари ижроси ва бошқа долзарб масалалар юзасидан ўтказилган видеоселектор йиғилишида вилоят ҳокими вазифасини бажарувчи Хайрулло Бозоров маълум қилди, дея хабар беради «Дарё» мухбири Азизжон Эрматов.
Бозоровга кўра, вилоятда спортни оммалаштириш ишига алоҳида эътибор қаратилади.
Барча соҳалар қатори вилоятимизда футболни ҳам ривожлантиришимиз керак. «Нефтчи» шонли тарихга эга жамоа. Унинг олдинги салоҳиятини тиклашимиз лозим. «Нефтчи»ни Суперлигага қайтарамиз. «Истиқлол» клуби ҳам фаолиятини давом эттиради.Хайрулло Бозоров, Фарғона вилоят ҳокими вазифасини бажарувчи
«Нефтчи» — 1962 йилда ташкил этилган клуб. 1991 йилгача «Нефтьяник» номи билан аталган. 1992 йилдан бошлаб клуб номи «Нефтчи»га ўзгарган. Клуб Ўзбекистон чемпионлигини 5 марта, мамлакат кубогини эса 2 бор қўлга киритган. Жамоа ўз тарихида илк бор 2018 йилги мавсум якунларига кўра, Суперлигада сўнгги ўринни олиб қуйи дивизион — Про-Лигага тушиб кетганди.
«Истиқлол» эса 2016 йилда ташкил этилган хусусий клуб ҳисобланади. Жамоа ҳозирга қадар Про-Лигада иштирок этиб келаётганди. Бироқ жамоа бир муддат аввал молиявий инқироз сабаб фаолиятини якунлагани ҳақида хабар берилганди.
Изоҳ (0)