Jahon sog‘liqni saqlash tashkiloti koronavirusga qarshi samarali vaksina barchaga yetib borguniga qadar dunyo bo‘ylab 2 millionga yaqin odam halok bo‘lishi mumkinligini istisno etmadi. Bu haqda tashkilotning favqulodda vaziyatlar bo‘yicha ijrochi direktori Maykl Rayan 25-sentabr kuni o‘tkazilgan brifingda ma’lum qildi, deb xabar beradi “RIA Novosti”.
“Buni, shubhasiz, tasavvur qilish qiyin, biroq bu holat ehtimoldan holi emas. Chunki biz 9 oy ichida bir million kishini yo‘qotdik va yaqin 9 oy ichida vaksinaning paydo bo‘lishiga jiddiy qaraymiz”, — deydi Rayan.
Uning so‘zlariga ko‘ra, ayni vaqtda moliyalashtirish, ishlab chiqarish va vaksinalarni baholashda muammolar bor.
Shu bilan birga, Rayanning ta’kidlashicha, shifoxonaga yotqizilgan bemorlar orasida o‘lim holati kamaymoqda. Shu sababli odamlar o‘limiga yo‘l qo‘ymaslik uchun dunyoda o‘tgan to‘qqiz oy bo‘yicha xulosa chiqarish imkoniyati mavjud.
Avvalroq JSST dunyoda COVID-19 bilan kasallanish bo‘yicha rekord ko‘rsatkich qayd etilganini ma’lum qilgandi.
Jon Hopkins universiteti ma’lumotlariga ko‘ra, ayni vaqtda butun dunyoda koronavirus bilan kasallanganlar soni 32,5 million kishiga yaqinlashgan. Hozirga qadar bemorlarning 22,3 millioni sog‘aygan bo‘lsa, 987 mingdan ortiq odam COVID-19 qurboniga aylangan.
Izoh (0)