Turkmaniston Xalq Maslahati 25-sentabr kuni mamlakat Konstitutsiyasiga o‘zgartirish kiritish masalasini ko‘rib chiqdi va o‘zgarishlarni ma’qulladi. Bu haqda “Xronika Turkmenistana” xabar berdi.
Turkmaniston prezidenti Gurbanguli Berdimuhamedov raisligida onlayn formatda o‘tgan Xalq Maslahatining yig‘ilishida hukumat a’zolari, parlament raisi va deputatlari, vazirliklar va partiyalar rahbarlari, viloyatlar va shaharlar hokimlari, hududlardagi xalq maslahatlari a’zolari va jamoatchilik vakillari ishtirok etgan. Yig‘ilishning asosiy mavzusi mamlakat Konstitutsiyasiga taklif qilingan o‘zgartirish bo‘lgan.
Xalq Majlisi ishtirokchilari “Turkmaniston Konstitutsiyasiga o‘zgartirish va qo‘shimchalar kiritish to‘g‘risida”gi konstitutsion qonun loyihasini bir ovozdan ma’qullagan. Shundan so‘ng Turkmaniston prezidenti qonun loyihasi ko‘rib chiqish uchun parlamentga taklif qilinishini bildirgan.
“Xronika Turkmenistana”ning yozishicha, Xalq Majlisi yig‘ilishining tanaffusi vaqtida mamlakat parlamenti — Majlisning navbatdagi yig‘ilishi bo‘lib o‘tgan. Majlis deputatlari “Turkmaniston Konstitutsiyasiga o‘zgartirish va qo‘shimchalar kiritish to‘g‘risida”gi konstitutsion qonun loyihasini bir ovozdan ma’qullagan va uni qabul qilgan. Shundan so‘ng qonun prezident Gurbanguli Berdimuhamedov tomonidan imzolangan.
Turkmaniston Konstitutsiyasiga kiritilgan o‘zgartirishga ko‘ra, mamlakatda ikki palatali parlament shakllantiriladi. Parlament Turkmaniston Milliy Kengashi deb nomlanadi va ikki palata — Xalq Maslahati (yuqori) va Majlisdan (quyi) iborat bo‘ladi.
Qabul qilingan qonun 2021-yil 1-yanvardan kuchga kiradi. Shu munosabat bilan Xalq Maslahatining vakolati tugatiladi. Qonunga ko‘ra, Milliy Kengashning palatalari a’zolarining birinchi saylovlari muddati prezident tomonidan belgilanadi. Berdimuhamedov yangi shakllantiriladigan parlament uchun saylovni 2021-yilning birinchi choragida o‘tkazishni taklif qildi.
Avvalroq Konstitutsiyaga kiritiladigan barcha o‘zgartirish va qo‘shimchalar 2020-yilning iyul oyigacha muhokama uchun e’lon qilinishi bildirilgan. Biroq bu ish amalga oshmagan.
Gurbanguli Berdimuhamedov 19-avgust kuni Konstitutsion komissiya a’zolari bilan yig‘ilish o‘tkazgan. Komissiya a’zolari mamlakatning yangi Konstitutsiyasi loyihasi ustidagi ishlar yakunlanganini ma’lum qilgan.
Ma’lum bo‘lishicha, yangi Konstitutsiyada Milliy Kengashning vakolatlari belgilab berilgan. Mamlakatning barcha sobiq prezidentlari parlamentning yuqori palatasidan o‘z joyiga ega bo‘ladi.
Izoh (0)